No.7472/2020-2021

Vawiin chhun dar 12:30 khan Serchhip DC's Conference Hall ah Fire Prevention Week 2021 hawnna inkhawm neih ani a, Serchhip Bawrhsap Pu Kumar Abhishek, IAS chu khuallian ani.

Khuallian Pu Kumar Abhishek, IAS, Serchhip District Fire Prevention Committee Chairman ni bawk chuan mihring nunna atana pawimawh ber boruak thianghlim kan hmuhna hnar leh sik leh sa siamtu ramngaw te hi humhalhin, kangmei laka ven that a pawimawh thu a sawi a. Ram kang chuan mihring leh nungchate tana boruak thalo siamin, nunna atana hlauhawm a thlen mai bakah nungchate chenna tur a tihchhiat tel ṭhin avangin kangmei laka inven hi a pawimawh tak zet ani, ati a. Ei leh bar kan zawnna kawngah pawh ramngaw ti chhelo zawnga hmalak dan kan zir a tul tawh hle ani a ti bawk. Kangmei chhuak thei laka invenna kawngah Department mal chuaha hmalak a harsat thin avangin sawrkar department zawng zawngte ṭanrual a tul a ni, a ti a. Tlawmngai pawl hrang hrangte pawh ṭan la thar leh ṭheuh tura chahin, ram kang laka inven chu chhuan lo awm tura kan tu leh fate tan a pawimawh deuh deuh dawn ani tiin, kan fimkhur thar a tul thu a sawi. Fire Prevention Week (Kangmei laka invenna hapta) hman chhung hian sawrkar department hrang hrangten hmachhawp an neihte ṭha tak leh tluang taka an tih hlawhtlin theih nan duhsakna a hlan bawk a ni.

Pi Margaret Lalramchhani, DFO Thenzawl chuan report peiin, kum kalta chhung khan Serchhip District chhungah kangmei chhuak hmun 119 ah a awm a, heng zinga 95 te chu Lo hal avanga kangmei chhuak niin, hmun 25 ah mimal ram kang a awm bawk. Kum kalta November thla aṭanga vawiin thleng khan hmun 19 ah kangmei chhuak awm tawhin Hectare 52.6 a zau ram a kangchhia ani. 

He hunah hian Pi Jenny Sailo, DFO, N.Vanlaiphai kaihhruaina in kangmei tichhuaklo tura intiamna thu chhamrual ani bawk.

Fire Prevention Week hawnna inkhawm hi Pu RL Chhuanawma, Honorary Wildlife Warden chuan a kaihruai a, sawrkar department hrang hrang hotute leh Govt. Serchhip College zirlai naupang thenkhat an tel a. Tukin zing dar 7:00 khan he hun pual hian DC Office Complex atanga Serchhip Bazar thlengin kawngzawh neih a ni tawh bawk a ni.