No.7471/2020-2021
Khawzawl District Bawrhsap Pu Zothanmawia, Chairman, District Task Force on Covid-19 Vaccination, Khawzawl District chuan vawiin khan thuchhuah siamin, Khawzawl District mipuite chu Covid-19 vaccine chungchanga thuthang diklote hnawla Doctor leh sawrkar thuchhuah chauh ngaipawimawh turin a sawm a. Covid-19 hrileng a la reh loh avangin mipuite himtlanna tura sawrkarin inkaihhruaina a duante tha taka zawm chhunzawm zel turin District mipuite a sawm a ni.
Covid-19 vaccine lak hi Covid-19 hrileng laka invenna leh nunphung pangngaia kan let leh theihna tura rahbi pawimawh tak a ni a. Chutihrualin, social media leh hmundangah-te vaccine chungchanga insawithaihna lam hawi thu dik lo leng vak a tam hle a. Khawzawl District mipuite chu heng thuthangte aia Doctor-te thusawi leh sawrkar thuchhuahte ngaipawimawha zawm zawk thin turin District Bawrhsap chuan a sawm a ni.
Pu Zothanmawia chuan Covid-19 vaccination kalpui a nih mek laiin, hrileng laka him nana sawrkarin inkaihhruaina (SOP) a siam hrang hrang - mask vuah, kut silfai ngun, midang nena inhnaih loh leh a dangte pawh ngaihthah lo tur leh uar chhunzawm zel turin Khawzawl District mipui zawng zawngte a sawm bawk a ni.
India ram leh Mizoram hmundang angin Khawzawl District-ah pawh Covid-19 Vaccination hi kalpui mek a ni a. Tun dinhmunah Khawzawl District-a Healthcare Worker mi 140 in vaccine (Covishield) dose khatna an la tawha, Frontline worker dang leh mipui nawlpuite tan pawh vaccine hi lak theih tura ruahman chhoh mek zel a ni.
