4765/2025-2026

Dated Serchhip, the 10th March, 2026: Vawiin khan Serchhip Kawnpui VC Hall ah hmeichhia hleilenna tuartu te tan Free Public Hearing - Mahila Jan Sunwai neih a ni a. DC Pu Paul L Khuma leh Mizoram State Women Commission Chairperson Pi C Zodinpuii ten hun an hmanpui a ni.

Sawrkar hna thawk kan ni a, mipui rawngbawlsaktu kan nih angin vawiina kan thiltih hi mipui rawngbawlsakna ‘government service’ a ni, DC chuan a ti a. Aizawl pan ngai lovin, a thawktute ngei rawn kal a, kan harsatnate min chinfel sak hi a lawmawm tak zet a ni, a ti. Pu Paul L Khuma chuan domestic violence - nupuite kutthlak ching kan awm chu pawi a tih thu sawiin nu leh pa ten kan fate entawntlaka kan awm a tulzia i hre thar leh ang u, a ti a. Kan nute emaw, kan farnute emaw, hleilenna tuar kan awm chuan a thlenna tur dik takah kan thlen a, Dan-in dikna chanvo min pekte hi a taka kan chan theih a tul thu sawiin Mahila Jan Sunwai tangkai taka hmang turin duhsakna a hlan a ni.

Mizoram State Women Commission Chairperson Pi C Zodinpuii pawhin thu sawiin hmeichhia hleilenna tuar ten Aizawl an pan kher ngai loin District tinah DC kaihhruaina hnuaiah Commission member te, Legal Services Authority, CDPO, DPO, DCPO, police department te nen tanghoin International Women’s Day denchhenin 9- 13 March, 2026 chhung hian Mahila Jan Sunwai an neih thu a sawi a. Serchhip District ah chuan March ni 10, 2026 hian nilengin hun an hmang dawn a, an harsatna chinfel nghal theih chi chu chinfel nghal a ni ang, a ti. Case lut a tam lo a nih pawhin mi tlemte tal pawhin hlawkna an chan theih hi kan duh a ni, a ti bawk.

Vawiin nileng khan Mahila Jan Sunwai hun hi hman a ni a. Hmeichhe pangate complaint dawn a ni a, an case hi hmun leh hmunah chin fel nghal theih a nih loh avangin police, DLSA leh OSC lamah refer an ni. Complaint tam zawk te hi hmeichhiate dikna chanvo rahbeh sakna te, chhawmdawlna dawn tur ang dawnglo te, ro khawm chungchanga buaina te leh child custody chungchang te an ni.