4764/2025-2026

Champhai, dated 10th March 2026: Vawiin khan Champhai Circuit House Conference Hall-ah International Women's Day (Hmeichhiate Ni) pualin Mizoram State Commission For Women (MSCW) leh Champhai hotute bultumin hmeichhiate chawikanna leh lawmna hun, Mahila Jan Sunwai hman a ni a, Champhai Bawrhsap Pu Mohammad Aaquib chuan hmanpuiin thu a sawi. He hunah hian Champhai hmeichhiate'n harsatna an tawh te sawina hun (public hearing) a awm bawk a ni.

Bawrhsap Pu Mohammad Aaquib chuan Women's Day pualin hun hman ni mahse hmeichhiate chu nitin kumtluana lawm tur an ni tih a sawi a, public hearing an neih tur te pawh tha taka hman a nih theih nan leh nakin zelah pawh hman tangkai a nih theih nan a fuih a. He hun hlu tak buatsaihtute chungah lawmthu sawiin Mahila Jan Sunwai a hawng nghal a ni.

He hun hi MSCW Member Pi Lalchhuanmawii'n kaihruaiin he hun thiltum leh MSCW hnathawh hrang hrang te a sawi. International Women's Day puala intihsiakna Essay Writing Competition lawmman sem a ni a, lawmman latute chu

1st - Andy-a Pa
2nd - Zorinpuia
3rd - Zothansangi

te an ni. Khawtlang tana inpekna avanga chawimawina Selfless Service Award Pi Lalchhandami, New Champhai hnenah hlan a ni bawk a ni.

He hunah hian Champhai pisa hotute leh hmeichhia thahnem tak an tel a ni.