3631/2024-2025

Dated Serchhip, the 20^th December, 2024: Vawiin khan Serchhip DC Pu Paul L.Khuma hoin Serchhip DC Pisapui Hall-ah Good Governance Week hawnna inkhawm neih a ni a. Raltlan mi 558 te hnenah tanpuina buhfai leh sum semchhuah a ni bawk.

DC Pu Paul L Khuma chuan Good Governance Week ah hian rilru thar pu turin sawrkar hnathawkte a sawm a. Mipui tana hna thawk an ni tih hria a, thahnemngai turin a fuih a. Sawrkar dan zawm chungin, a dik chin kalpel si loin, mipuite hmasawnna leh an tana awlsamna kan zawn sak zel tur a ni, DC chuan a ti.

Good Governance in a tum ber chu mipuite tana sawrkar inrelbawlna tha siam a ni a. Prime Minister hlui boral ta Pu Atal Behari Vajpayee-a piancham December ni 25 chu India sawrkar chuan Good Governance Day ah a puang a. Kum 2014 atang khan kum tin  hman thin a ni a. Good Governance Week hi December ni 19 atanga intanin December 24 thleng neih a ni dawn a ni.

Kum tin thupui hrang hrang thlan bik neiin Good Governance Week hi hman thin a ni a. Kumin thupui atan “Prashasant Gaon ki Ore” tih chu thlan a ni a. He thupuiin a tum ber chu thingtlang khuaa cheng ten sawrkar hmalakna leh scheme tha tak tak te an chhawr tangkai theihna tura awlsamna siamsak a ni a. Khaw hla tak tak atanga khawpuia office dawr ngai fo thin tihziaawm na turin Sawrkar hnathawkten mipuite pan chilhin fehchhuah programme hun hman thin a ni dawn a ni.

Vawiin Serchhipa hawnna programme hi Additional DC Pu Lalrinzuala’n a kaihruai a. SDO (Sadar) Pi F Lalnisai chuan powerpoint hmangin Good Governance Week hman chhan, nih phung leh DC hma lak tawhna te a sawifiah a. DIPRO Pi Lalnunmawii chuan lawmthu sawiin hun hnung a khar a ni.

Vawiin vek hian Serchhip DC Pu Paul L Khuma chuan Serchhip District chhung khua/veng 25 pan tur motor 5 a vai liam a. Heng motor te hian raltlan chhawm dawl ngai mi 558 te ei tur buhfai quintal 117.5 a phur a. Hei bakah hian raltlan te tanpuina sumfai chu Branch hrang hrang YMA hruaitute hnenah hlan a ni bawk.