745/2024-2025
Dated Serchhip, the 11th June, 2024: Serchhip District Level Committee on Green Mizoram huaihawtin vawiin khan Serchhipah Green Mizoram Day hman a ni a. He ni puala inkhawm, DC Conference Hall a buatsaihah Serchhip DC Pu David Lalthantluanga chu khuallian a ni a. Function neih zawh a nih hnu hian Kikawn - Bukpui inkarah Green Mizoram Day puala thingphun runpui neih a ni.
DC Pu David Lalthantluanga chuan Green Mizoram Day kan hman chhan sawiin kan nunna atana pawimawh em em thing leh mau a chereu zel lohna tura inzirtirna hun atan leh a ti chereu tu niloa phun belhtu kan nih theuh theihna tura buatsaih a ni, a ti a. Sik leh sa, thing leh mau, ramsa leh nungcha te, keini mihringte leh thil nung zawng zawng hian dam khawchhuak turin kan inmamawh tawn theuh avangin environment humhalh pawimawhzia hi kan zirchhuah a, kan nunpui a tul a ni, a ti. Pu David Lalthantluanga chuan ramngaw kan vah darh nasat luatin nghawng tha lo tak a neih zingah tuihna tlem tial tial te, sik leh sa, boruak inthlak nasa te, leimin lo nasa tial tial te hi a tel thu sawiin harh thar a hun tak zet tawh, a ti a. Vawiina kalkhawmte leh Green Mizoram Day hmang tu zawng zawng ten kan zavaia mawhphurhna a nih hria a, midangte zirtir chhawngtu ni turin a fuih a ni.
Mizoram pum huap inelna buatsaih hnuhnung berah District Headquarters zingah Serchhip chu District fai bera thlan a nih thu sawiin Pu David Lalthantluanga chuan hei hi a chhuanawm rualin kan faina hian belhchian a dawl em tih kan ngaihtuah tur a ni, a ti a. Mahni inchhung leh tual zawl te, kan kawtkai chauh te ni loin lui kawr te, kawngpui te leh hmun kilkhawr lai te thlengin, a lang lai leh lang lo laite tihfai kan zir tur a ni, tiin kalkhawm te a fuih a. Sawrkar leh tlawmngai pawlin faina beihpui an thlak thin te, thingphun beihpui an thlak thin te hi a Ni bik atan chauh ni loin, mipui mimir a tam thei ang berin awareness kan lo neih a, kan nunpui theih na turin an buatsaih thin a ni, DC chuan a ti.
Vawiin Green Mizoram Day hmanna hunah hian kangmei ven kawnga hma la tha te hnenah lawmman sem chhuah a ni a. Kangmei ven kawnga khua/veng ti tha berah Chhingchhip Mualpui khua thlan niin, sumfai Rs 50,000/- leh certificate an dawng a. Serchhip Dinthar pahnihna niin Rs 30,000/- leh certificate an dawng a, Sailulak chu pathumna niin Rs. 20,000/- leh certificate an dawng a. East Lungdar, Buangpui leh Ngentiang ten consolation prize an dawng bawk a ni.
Green Mizoram Day puala inkhawm hi Thenzawl DFO Pu Lalnungrenga'n a kaihhruai a.“I nunna atan thing phun rawh” tih thupui hmangin Pi Malsawmtluangi, Govt.Serchhip College Assistant Professor chuan presentation a pe a. Serchhip District MJA President, Serchhip District Level Committee on Green Mizoram member ni bawk Pu C Lalhminghlua kaihhruaiin thutiam (pledge) sawi rual a ni.
Kum 1998 khan Mizoram Sawrkar remhriatnain ‘Green Aizawl’ tih hmingpuin thingphun beihpui thlak a ni a. Sawrkar chuan Aizawl khawpuiah chauh nilo, Mizoram pum tuam chhuak turin, huam zau zawkin ‘Green Mizoram’ tih hming vuahin kum 1999 atang khan mumal takin Green Mizoram Day hi Mizoram pumah hmang tan a ni ta a. Kum tin thupui bik thlan chhuah thin a ni a. Kumin thupui atan hian “I nunna atan thing phun rawh” tih chu thlan a ni.
Attachment
- Loading attachment...
