746/2024-2025

Aizawl the 11th June, 2024 : Vawiin khan Mizoram State Cooperative Marketing & Consumers Federation (MIZOFED) chuan an Annual General Assembly vawi 26-na chu Synod Conference Centre-ah an hmang a. He hunah hian Co-operation Minister Pu P. C. Vanlalruata chu Khuallian niin Pu V. L. Zaithanzama, MLA (Aizawl West-III) chu Khualzahawm a ni bawk.

MIZOFED Annual General Assembly hawnna inkhawm MIZOFED Chairman Pu K. Rothangpuia kaihhruaiah Khuallian Co-operation Minister Pu P. C. Vanlalruata chuan thusawiin Mizoramah Cooperative Movement hi tha leh chak taka kalpui theih chu nise ram siamthat leh hmasawn nan hmun pawimawh tak a luah thei a ni a ti. Sorkar laipui pawhin Cooperative Movement chu ngai pawimawhin kum 2019 atang khan Ministry of Agriculture hnuai atangin lachhuakin Ministry hran angin a din tawh a, ramchhung state tam takah chuan miretheite khaichhuah nan leh eizawnna atan Society-te chu hman mek a nih thu a sawi a. India hmarchhak state pahnihah National Cooperative Development Corporation (NCDC) Office hawn thar zingah Mizoram pawh a tel a, chuvangin Mizo thalaite pawhin a hma aiin Cooperative Movement rawn tuipui a, eizawnna tlak a ni tih hriain, NCDC-te kaihhruaina hnuaiah Mizoram State-ah pawh Society-te tihchangtlung a nih deuh deuh theih nan tanruala tihtakzetna nen thawhho a tul a ni a ti. Khawvel pumah Cooperative Society hrang hrang hmanga eizawng chu mihring maktaduai 280 vel an tling a, Mizoramah pawh ngaih pawimawh a hlawh deuh deuh a, thalai tam takte tana eizawnna tlaka siam chhoh chu sorkar thil tum a ni tiin Ministry of Cooperation-ah Mizoram tan project thehluh tum a nih thu a tarlang bawk. Vawiin MIZOFED General Assembly district hrang hrang atanga rawn chhimtu zawng zawngte duhsakna a hlanin, hmalam pena Cooperative Movement a kal zel theih nan thawhhona tha tak nei zel chunga an rilru leh ngaihtuahna seng turin a chah.

Khualzahawm Pu V. L. Zaithanzama, MLA pawhin thusawiin Cooperative Movement chu sorkar atanga tanpuina beisei lova mahni leh mahni intanpui thei tur an nih laiin Mizoramah chuan rin aiin a hlawhtling em em lo a ni a ti a. Tun hnaiah MIZOFED-in essential commodities-a a sumdawnnaah hma a sawn chu a lawmawm hle a; Society hi company a nih loh avangin cooperative principle kengkawh chungin thawk zel turin a chah a ni.

Vawiin MIZOFED Assembly-ah Pu R. Lalremsanga, Registrar, Cooperation Department leh Pu Rinzuala, Interim Managing Director, MIZOFED te pawhin thusawiin Mizorama Cooperative Society-te dinhmun leh kum kaltaa MIZOFED hnuaia hlawhtlinna hrang hrangte an tarlang a. MIZOFED Annual Report tarlan danin tun dinhmunah thawktu 171 neiin sumdawnna hlawm lian pathum (3) kalpui mek a ni a, chung atanga kum kalta 2023-24 chhungin MIZOFED-in hlawkna (net profit) a hmuh zat chu cheng 1,68,21,485.07/- a ni.