747/20247-2025

Champhai, the 11th June, 2024: Mizoram hmun dangte rualin vawiin khan Champhaiah District Level Committee on Green Mizoram huaihawtin 'I nunna atan thing phun rawh' tih thupui thlan hmangin Green Mizoram Day vawi 26-na hman a ni. Green Mizoram Day 2024 puala hun hman hi Adviser to CM (Technical) Er. H.Ginzalala, Champhai North bialtu MLA chuan khuallian niin a hmanpui a ni.

Green Mizoram Day puala inkhawm tawi Mangkhaia Hall, Champhai Zotlanga buatsaihah Khuallian Adviser to CM (Technical) Er. H.Ginzalala chuan kan chhehvela awm thil siam hrang hrangte leh leilung kentelte hmangaih leh duat taka kan enkawl thiam a tul thu sawiin, mahni inhmangaih mai bakah kan kianga awmte hmangaih hi kan tih mamawh a ni, a ti a. Khawvel sik leh sa danglam leh hun bi insawn mekin eizawnna leh nitin khawsak kawngah nghawng nasa tak a neih thu sawiin, kum 1700 chhova Industrial Revolution lo chhuak atanga intanin zawi muangin sik leh sa a inthlak danglam chho tan a, kum 2000 hnu lamah phei chuan a kumtelin khawvel lum dan pawh a sang chho chak hle a ni, a ti bawk.

Er. H.Ginzalala chuan boruak tichhe thei ang chi reng rengte hman tlem deuh deuh a pawimawh thu sawiin, hemi kawngah hian ngaihtuahna sen tlan a tul hle a ni, a ti a. Tul lova ram tih kan leh thing leh mau tihchereuin sik leh sa ah nghawng nasa tak a neih dante tarlangin, kum tina thlawhhma thlak reng thin titlema hmunhma ngheta Lo neih a nih theih nan Sawrkarin permanent farming lamah tanlak a tum thu a sawi a. Mitinin carbon kan tihchhuah thin chu ti tlem tura theihtawp chhuah a tul thu a sawi bawk a. Tourism sector-a theihna sang tak nei Champhai District-ah tourism chawilar chu khuarel thilsiam mawi tak tak humhalhna a nih bakah sik leh sa inthlak zel tur venna kawnga hmalakna tha tak a nih thu a sawi a. Kalkhawmte chu kawng kama thingphunte uluk taka enkawl turin a chah a. Green Mizoram Day chauh nilo hun remchang apiangah thingphun uar tur leh a enkawl chhunzawm thlenga ngaipawimawh turin a chah nghal bawk.

He hun puala inkhawm tawi buatsaih hi District Bawrhsap Pu James Lalrinchhana chuan kaihruaiin Member Secretary & DFO Champhai Pu Lalbiakchama Chawngthu hnen atangin Green Mizoram Day report ngaihthlak a ni a.  Champhai RO Pu Jonathan Lalhruaitluanga'n thingphun hnatlang neih dan turte a sawifiah hnuah Green Mizoram Day thingphun hnatlangpui neih chhunzawm nghal a ni.

Vawiin Green Mizoram Day hmanna hunah hian kangmei ven kawnga hma la tha District Level Awards for Fire Prevention lawmmante sem chhuah a ni a. Kangmei veng kawnga khua/veng ti tha berah Ruantlang thlan niin, sumfai Rs 50,000/- leh Citation an dawng a. Thekpui pahnihna niin Rs 30,000/- leh Citation an dawng a, Lungphunlian chu pathumna niin Rs. 20,000/- leh Citation an dawng a ni. Heng bakah hian 'Engtinnge Champhai District kangmei lakah a fihlim theih ang' tih thupui hmanga essay inziahsiak lawmman sem chhuah a ni a, lawmman dawngtute chu,

Pakhatna: R. Lallawmkima, Champhai Vengsang, Rs 10,000/- leh Citation

Pahnihna: C. Lalrochhara (Kimkima Pa), Ruantlang, Rs 7,000/- leh Citation

Pathumna: TPS Thanga, Champhai Bethel Veng, Rs. 5,000/- leh Citation

Kumin Green Mizoram Day Champhaia thingphun hnatlang hi NH 6 Chhungte khaw hnuai atanga Tuipui lei inkarah neih niin, Planting Agency hrang hrangte'n plot 40 ah Tlaizawng tiak 864 leh April tiak 200, avaiin thing tiak 1064 an phun a ni.

Vawiin Green Mizoram Day pual hun hmanah hian District Level Committee on Green Mizoram member-te, Sawrkar Department hrang hrang thawktute, NGO, VC, Zirlaite leh Chanchinbumite an tel a. Heng bakah hian District hmun hrang hrangahte thingphun hnatlang neih a ni bawk.

Green Mizoram Programme hi Green Aizawl Programme tiin kum 1998 ah tan a ni a, Mizoram Sawrkar hmalaknain kum 1999 atangin Mizoram pumpui tuamchhuak turin Green Mizoram Programme ti a thlak a ni a. Hemi hnu hian urhsun takin District hrang hrangah Sawrkar leh NGO tangkawpin a huaihawt chhunzawm th a ni.