748/2024-2025

Dated Siaha, 11th July 2024: Vawiin chawhma dar 10  khan 'Siaha District Level Sub-Committee on Green Mizoram' bultumin  'Green Mizoram Day 2024'  hawnna inkhawm chu Forest Conference Hall, MADC - ah neih a ni a. Pu M. Laikaw, Chief Executive Member (CEM) MADC, chuan khuallian niin a hmanpui a, Pu Ngurthansanga, SDO (Sadar) chuan  inkhawm hi a kaihruai.

Pu M. Laikaw chuan 'Green Mizoram Day' hmang tura lo kalkhawmte chungah lawmthu sawina a nei hmasa a. Indonaa kal tur sipaite pawhin training  tha tak an nei thin  angin mipuite pawh intuaithar ngai reng kan nih avangin vawiin program ang  hi hmanfo a tul hle a ti. Green Mizoram Day - pual chauh ni lo va, kan dam khawchhuah nana kan mamawh tak thil a ni tih hriaa, thingphun uar zel tura mitinin tan  lak a ngai a ni, a ti. Siaha mipuiten an mamawh lian ber nia a hriat chu thingphun enkawl chungchang anih thu sawiin, mimal emaw pawl ang pawhin vawi tam tak thingtiak phun a lo ni tawh a, damkhawchhuak erawh a tlem thin hle a, hei hian a enkawl chhunzawm kawngah hmalak a tul zia a tilang chiang hle a ti. Pu M. Laikaw chuan Forest Department- ten thahnem ngai takin thing an phun thin a, chutih rualin mipui nawlpui tawiawmna tha an dawng lo hle a ni a ti. Thingphun hi Forest department - te kutah chauh dah chi a ni lo a, sawrkar department zawng zawng bakah ram mipuite nena tangrual  ngai a ni tiin, thawhhona tha tak nei tura  rilru siamthar turin a sawm a ni.

Pu M. Laikaw chuan vawiin program hmang tura lokal te chu mipuitling zawk an nihna hre tur leh midangte zirtir kawnga sulsutu ni turin a sawm a.  Green Mizoram piah lamah  Green India - siam turin Green Maraland siam hmasak a tul hle a ti a. Green Maraland-  siam tur chuan a chhunga chengten mawhphurhna lian tak an nei a ni tiin, hmasawn zel turin theihtawp i chhuah ang u tiin a sawm.  Thing phun leh enkawl zui chu mimal anga kalpui har tak anih thu sawiin khuallian chuan sawrkar leh mipuiten lungrual taka thawhho a tul hle a, i thawkho zel ang u a ti.

Pu M. Laikaw chuan vawiin ang hun hman hi thil pawimawh tak, ram leh hnam bakah kan nunna nena  inzawm tlat a ni a, vawikhat hmana duhtawk mai lovin, kan nitin nunah sengluh kan tum tur a ni, a ti. Green Mizoram Day- atana thupui thlanchhuah 'I nunna atan thing phun rawh' tih chu tawngkaa sawi duh tawk mai lo a, a  taka nunpui turin a ngen a. Ram leh hnam, khawtlang nuam leh chhenfakawm zawk siam turin thingphun leh a enkawl lamah rilru thar nen tan i la thar ang u tiin Siaha mipui zawng zawngte a sawm nghal a ni.

Vawiin hun  hmanna ah hian kangmei chhuak tur venna kawnga  thawk tha khua leh chanchinbu mite hnenah lawmman hlanna neih nghal a ni a. Lawmmman dawngtute chu a hnuaia tarlan ang hi a ni

Best Performing Village to Combat Fire Incidence

1. Chheihlu -Rs. 50000 + Citation

2. Saikao - Rs. 30000 + Citation

3. Amobyu Vaithie- Rs. 20000 + Citation

Best Media in Propagating Fire Awareness

1. Maraland - Rs. 3000

2. Kawleng - Rs. 2000

3. Moonlight - Rs. 1000

Pu Ngurthansanga, SDO (Sadar) chuan vawiin 'Green Mizoram Day 2024' hawnna inkhawmah hian kalkhawmte hnena lawmthu sawina neiin hun a khar.

Vawiin 'Green Mizoram Day'  pual hian thingphun hnatlang runpui neih nghal a ni a. Sawrkar Department- te chu pawl hnihah  then niin, Tisopi khaw panna leh Tipi Ferry panna kawngah thingtiak  an phun a, an thingphunte hi a hungna tha tak siam nghal vek niin, department hrang hrangte an tel kim tha hle . Mimal leh pawl anga thing phun duhtute  tan pawh Forest Department, MADC chuan a thlawnin  thingtiak hi an semchhuak nghal  bawk.