1514/2023-2024

Dated Serchhip, the 15th August, 2023: India ram hmun dangte rualin Serchhip District pawhin India Independence Day 2023 chu ropui takin lawm a. Serchhip Sports Complex-a Independence Day lawmnaah hian Education Minister Pu Lalchhandama Ralte chu khuallian niin parade contingent 14 te hnam puanzar chibai buk a chhang let a ni.

Thu sawiin Pu Lalchhandama Ralte chuan Serchhip mipuite Independence Day chibai a buk a. Ram hruaitu hmasate, ram leh hnam hmangaiha, huaisen taka mahni inphata ram zalenna sualtute hre reng tur leh mahni a ro in rel sawrkar kan neih theihna tura theihtawp chhuah a, hmathlir thui tak nei chunga ram zalenna sual chhuaktute hnenah zahna leh chawimawina hlan turin mipuite a sawm a ni.

Pu Lalchhandama Ralte chuan Serchhip District chhunga sawrkar hmalakna hrang hrang a sawi a. Mizoram Sawkar Flagship Programme SEDP hmanga sawrkar hnathawh langsar zual thenkhat te tarlangin PWD Serchhip Division in inkalpawhna kawngpui engemawzat an chei that te, AH&Vety kaltlanga beneficiary ten SEDP pilot project leh Family Oriented SEDP hmanga tanpuina an dawn te, Commerce & Industries hnuaia trade hrang hrang thlangtuten Family Oriented SEDP hmanga tanpuina an dawn te a sawi a ni.

Minister chuan Serchhip District ah zirna hmasawnna atana sawrkar hmalakna sawiin kum 2023-2024 academic session atan zirlaibu hi zirlai naupang 4998 te hnenah a thlawna sem a ni a; Primary School naupang 1997 leh Middle School naupang 1703 te hnenah a thlawna uniform sem chhuah a ni a; Midday meal hi naupang 6733 te tan buatsaih mek a ni, a ti. Govt Middle School leh Govt Primary School te tan choka bungrua sem mek a ni a, Chhingchhipah elementary zirlai hmeichhe naupang te tan Netaji Chandra Bose Avasiya Vidyalaya Hostel siam a ni a, Thenzawlah Secondary hmeichhe naupang tan hostel hawn thar a ni a, Baktawng Govt. P/S leh Khawbel Govt. P/S thawm that a ni a, Kanghmun S Secondary School leh Khawbel Secondary School ah te teachers quarters sak hna thawh mek a ni tih Pu Lalchhandama Ralte chuan a sawi bawk. Zirlai naupang rualbanloten tha taka school an kal theih nan sawrkar hmalak dan Education Minister chuan a sawi a. Naupang 20 hnenah escort allowance pek an ni a, naupang 25 hnenah transport allowance pek an ni a, braille stationery material naupang 3 pek an ni a, hmeichhe naupang 94 hnenah stipend for girls pek a ni a, an mamawh ang zelin wheelchair, tarmit, bengdar leh a dangte pek thin an ni, a ti.

Khuallian chuan kuthnathawktute tana sawrkar hmalakna tarlangin leilet nei chhungkaw 55 tan lane levelling unit 109 pekchhuah te, ran chaw siamna Composite Feed Mill, hriak sawrna Mini Oil Expeller Unit leh kurtai siamna khawl bun fel a nih tawh thu te, thlai chin tur engemawzat sem chhuah a nih thu te a sawi a. Vaimim thar kawngah tan lain Serchhip District chhung khaw hrang hranga vaimim 3167MT thar chhuah a ni a; zikhlum chin kawngah Serchhipah nasa taka hmalain kum 2022-23 chhung khan quintal 10,000 tharchuah niin cheng vaibelchhe 1.2 man hu vel zet a tling a ni, a ti.

Serchhipa Independence Day lawmna programme-ah hian parade contingent 14 an awm a. Parade Contingent ti tha ber lawmman dawngtu chu NCC Air Wing, Govt Serchhip College an ni a. Lawmman pahnihna chu Marian High School Contingent ten an dawng a, lawmman pathumna dawngtu chu Zoluti Memorial School Contingent an ni.

Serchhip DC Pu David Lalthantluanga chuan Independence Day puala carrom championship buatsaiha lawmman dawngtute hnenah lawmman a sem a. Serchhip Sub Hqrts YMA Cultural Troop ten hnam lam mawi tak an entir bawk a ni.