3671/2022-2023 

Dated Serchhip, the 24^th February, 2023: Vawiin khan Serchhip DC Conference Hall ah District Disaster Management Authority buatsaihin kangmei laka himna chungchang inzirtirna hun buatsaih a ni a, mithiamten in lam leh ram lam kang thei laka inven dan chi hrang hrang zirtirna an nei.

He hun hi Pu Lalrinsanga Hnamte, SO in a kaihruaia, Pi Nazuk Kumar, IAS, Chairman, Serchhip District Disaster Management Authority chuan a hawnna thu sawiin, Sensitization on Fire Safety buatsaih a nih chhan a sawifiah a. Kangmei chhuak thin vang hian in lamah pawh kan ramngawteah pawh kan rohlu kan chan nasa em em thin. Hei vang hian kangmei laka invenna lam kan inzirtir uar a tul a. Tin, kangmei a lo chhuah palh thuta kan tihtur leh tih loh turte pawh chiang taka mitinin naupang chena kan hriat hi a tul hle bawk. Vawiina kal khawmte hian kan thil zirte mi tam zawkte zirtira hrilh zelin, mitinin himna dante kan hriata kan zawm theuh a tul takzet a ni. Thal khawro hun kan thleng chho leh tan tak avangin mipuite zirtirna lam leh mahni hmazawna hma kan lak theihnaah Department tinte pawhin tan lo la turin ka sawm cheu a ni. Vawiinah hetiang inzirtirna atana Resource person tura kan beisei ten kan sawmna an rawn tihhlawhtlin avangin kan lawm hle a ni, a ti bawk.

He hunah hian Dr. Lalrokima Chenkual, Deputy Director, DM& R chuan ram kangin harsatna min thlen theih dan leh invenna tura hmalak dan tur chi hrang hrang zirtirna a nei a. Pu Ruatliana, Station Master, Fire & Emergency Services, Serchhip hnen atangin kangmei chhuahchhan leh invenna tur chi hrang hrangte zirtirna ngaihthlak a ni bawk. Kangmei chhuah palha a tul anga thelh turin a chhun a zanin an inralring reng tih a sawi a ni.

Pi F. Lalnisai, SDC, DM&R Serchhip Incharge Officer pawhin Serchhip district-a DDMA hmalak dan tlangpuite,  district chhunga chhiatna thlen tam dan te a tarlang a, kangmei chhuak thin chu mihring tihchhuah kangmei zel a nih thu a tarlang a ni. Eng chhiatna pawh lo thleng se rang taka hmachhawn anih theih nan Zonal Officer te hrilhhriat thuai zel a tul a, anni hriatpuina lova hma lo lak mai hian sum leh pai sanction zui thuah harsatna a thleng leh thin a, zonal officer te hriatpui ngeia hmalakin SDRF atanga tanpuina inpek a awlsam thin a ni, tiin Zonal Officer te kaltlang ngeia hmala thin turin mitinte a ngen a ni. Kum 2021 khan Serchhip district hmun 11 ah kangmei lian tham a chhuak a, kum 2022 ah lian thamin a chhuak lo thung. 

He hunah hian, Serchhip DDMA member te, Head of Offices te, district level NGOs aiawhte, Serchhip khawpui chhunga Branch YMA leh Village Council tin aiawhte an tel a ni.