2535/2022-2023
Dated Serchhip, the 3rd November, 2022: Vawiin khan Serchhip DC Meeting Hall ah kan hmaa Krismas leh Kumthar lo thleng tur boruak muanawm tak hnuaia hman a nih theih nana thil tulte sawi hovin Pu Lalmuansanga Ralte, Deputy Commissioner hovin kohhran leh tlawmngaipawl aiawhte an thukhawm.

Pu Lalmuansanga Ralte chuan, kan hmaah Krismas leh Kumthar kan beisei mek a, kum danga sawrkarin khuahkhirhna a lo siam tawh thin Halpuah, Halmawi leh Silai lem lam chite khapna te bakah ruihhlo te, rukruk leh sualna dang dangah uluk taka inven a tul leh dawn a. Chung sawrkar phal loh thilte khuahkhirhnate kan inhrilhhriat tlan hma a, hma kan lak ran a tul vang te, sumdawngte pawhin phal loh thilte zawrh tuma hma an lo lak loh nan hma takah committee an ko a ni tih a tarlang hmasa a, sawrkarin khapna a rawn siam chu district administration chuan khauh takin kan kengkawh mai dawn a, dan bawhchhia kan man te chu a tawp thlengin kan umzui dawn bawk a ni. Chuvang chuan vawiina member kalkhawm kohhran aiawhte, tlawmngaipawl aiawhte, sumdawng pawl aiawh leh chanchinbumiten min lo hriatsaka, mipuite hnena min lo thehdarh sak uar tur pawhin kan ngen che u a ni, tiin a sawm a ni.

Member te hian Krismas leh Kumthar hlim leh thlamuang taka kan hman theih nan a tul ang zela sawrkar thupek kenkawh ngei ni se an ti a. Serchhip Bawrhsapin a rang lamin khapna thupek tihchhuah ngaite tichhuak se, a kenkawh hna pawh kum danga kan lo tih thin angin Police te thawhpuia inlungrual taka bawhzui tlan ni se an ti a. Khapna thupek tihchhuah bakah hian Bawrhsapin kohhran hrang hrangte, tlawmngaipawl leh VC tinahte hnenah ngenna lehkha pechhuak se, an ti a. Tin, Serchhip Chamber of Commerce member ni chiah lo sumdawng dang hote pawh a zau thei ang bera puanzar ni se, an ti bawk a. Krismas leh Kumthar chhunga Halpuah leh Halmawi lam rik miah lohna veng YMA lamin lo chhinchhiah se, DC office in lawmman buatsaih sak se an ti bawk.

Meetingah hian Serchhip kohhran hrang hrang aiawhte, tlawmngaipawl aiawhte, sumdawng pawl aiawhte leh chanchinbumite an tel a ni.