1619/2025-2026

Dated Serchhip, the 26^th September, 2025: Vawiin khan UD&PA Office Serchhip ah vawiin atanga thla thar(October) Ni 2 thleng kalpui tur ‘Lok Kalyan Mela’ hawn a ni.

Serchhip District Urban Development Officer (DUDO) Pu Gaston Vanlalhriatpuia chuan ‘Lok Kalyan Mela’ chu hawngin, he Mela/Campaign kalpui a nih chhung hian Covid hrileng  avanga  Street Vendor ten harsatna  an tawh chhawmdawlna tur atana sawrkar laipui ruahmnanna PM Street Vendor’s  Atma Nirbhar  Nidhi (PM SVANidhi) Bank Loan chu awlsam leh tangkai taka hmang tur leh Bank Loan pung (interest) 7% a nih thu te, Sawrkarin  kuthnathawktute tan hamthatna tam tak Bank te nen tangkawpa a duan thu te  sawiin, he Mela chhung hian  PMAY–U hnuaia Insak tanpuina chungchang  pawh kalpui tel a nih dawn thu a sawi. In sak tanpuina (PMAY-U) chungchangah Thingtlang (Rural) ah tluangtaka kalpui a nih laiin, khawpui(urban) ah erawh thil buaithlak dang leh Geo Tagging-ah te harsatna neuh neuh an neih thin thu a sawi a. Thla thar October ni 2 thleng Serchhip UD&PA Office-a  ‘PM Awas Help Desk’ hawng a kalpui chhoh tur  ‘Lok Kalyan Mela’ hi a hawng a ni.

Pi Lalnunsangi, Manager, Mizoram Rural Bank, Serchhip Branch  hnen atangin Bank - Loan kalphung leh awmzia  te, Loan lak tumte hriattur pawimawh  tlangpui leh  Bank Loan interest /Subsidy nih phung te a sawi fiah a, Pi Rampansangi hnen atangin  PMAY-(U) Housing For All hnuaia  Insak tanpuina dawngtu-Beneficieries  te hriattur pawimawh tlangpui ngaihthlak a ni bawk.

Vawiina ‘Lok Kalyan Mela’ hawnna   Programme buatsaih hi  Pi Lawmzuali Manager, DAY-NULM, UD&PA Serchhipin a kaihhruai a. Serchhip leh Chhiahtlanga  UD&PA  hnuaia Street Vendors te leh PMAY-U Beneficieries thenkatte an tel a. He Mela kalpui a nih chhung hian  PM Street Vendor’s  Atma Nirbhar  Nidhi (PM SVANidhi) Bank Loan  leh PMAY-(U) Housing For All  hnuaia  Insak tanpuina chungchang ah hriat duh leh zawh duh neite tan UD&PA Office Serchhipah Office Hour chhungin a zawhfiah theih dawn a ni.