4033/2022-2023

Dated Serchhip, the 30th March, 2023: Vawiin khan District Programme Office, Women & Child Development, Serchhip District, Child Development Project Office, Serchhip District leh District Agriculture Office tangkawpin Agriculture Department Meeting Hall Serchhipah Sensitization & Awareness on Promotion of Millet Based Food Items (Regional & Seasonal) leh Millet Based Food Fairs & Events in the Millet Thali an buatsaih.

Pi Caryll Lalpari, CDPO Serchhip chuan thusawiin, International Year of Millets anih angin Millets chin uar leh a tharchhuah ei nasat kan inzirtir mek a, Agriculture Department in a chin lam an buaipui anga, ICDS in a sem chhuah lam an buaipui thung dawn a ni, a ti. He chaw tha hi taksa tana a thatnate kan hriat tawk loh avangin hlamchhiah a hlawh em em a. Tunlaia kan buaipui nasat em em thisen sang leh zumthlum natna laka min veng theitu chaw tha tak a ni tih hre tharin ei uar deuh deuh ang u, a ti a. Sawrkar laipui hmalaknain naupang kum 14-18 inkarte chaw tha pek vek tum a ni a, chung chaw tha zingah chuan millets pawh a telh uar tur a ni, a ti bawk.
He huna Resource Person Pu R. Lalrinawma, ADAO Serchhip District chuan Millets chanchin sawifiahin, kum khat thlai kan tih zing a mi- Buhtun, Puakzo leh Faisa kan tih hote hi an nih thu a sawi a. A chin dan leh enkawl dan tlangpuite sawiin, Serchhip District sik leh sa a mil em tih enchhin nan Sailulak ah leh Thenzawlah te an chin mek thu a sawi a ni. Buh leh Vaimimte aiin chin leh enkawl an awlsam zawka, lei chhia an ngamin chawm vak ngai lo thlai a ni, mihring leh ran tana chaw tha tak a ni, tiin Millets chin thatna tlangpui a tarlang a ni.

He hun kaihruaitu Pu James Lalremliana, District Coordinator, Poshan Abhiyan, chuan inlawmna thu sawiin Ministry of Women & Child Development in ruahmanna a siam angina ni 20th March – 3rd April, 2023 chhung hian hapta hnih chhung awh Poshan Pakhwada an hman mek thu a sawi a. He hun hi Chaw tha ei a tul zia inzirtirna hun niin, Millets leh a kaihhnawih chaw tha ei tam a that zia inzirtirna hun an hman mek thu a sawi a ni.

He hunah hian Anganwadi Workers te leh Govt. Serchhip College-a Botany zirlaite leh line departmenta thawktute an tel a. Chawhnu lamah Millet Based Food Fairs & Events in the Millet Thali an buatsaih bawk a ni.