4034/2022-2023

Aizawl the 30th March 2023: Vawiin khan Vanapa hall-ah Govt. Aizawl North College (GANC) ten September ni 12-17, 2022 chhunga an hman tak 'College Week' kharna hun an nei a; Sports & Youth Services Minister Pu Robert Romawia Royte chuan khuallian ni a hmanpuiin, Yellow House-te hnenah pakhatna lawmman a hlan nghal.

Minister Pu Robert Romawia Royte chuan college function ropui tak a Khuallian a sawm a ni chu lawmawm a tih thu a sawi a. Week-a lawmman dawngte chu a lawmpui rualin chak zo ve ta lo te pawh beidawng mai lova tang zual sauh turin a fuih a. Infiamna-a champion thin tam takte chu an chaklo fo thin thu sawiin “chaklo ngai mang lote chu an thleng thui ngai lo a ni” a ti.

Khuallian chuan lehkha zir ngawr ngawr piah lamah rilru hrisel nan taksa sawizawi a tul thu a sawi a, Infiamna chu mihring nuna bet tlat, sawrkar pawhin a a ngaih pawimawh em em a ni tiin, zirna (education) a tan pawh a pawimawh hle a ni, a ti a. Zirna leh infiamna chu inkungkaih tlat a ni, a ti. New Education Policy 2020-ah infiamna (sports) tih thumal chu vawi 30 lai a in ziah thu tarlangin Sawrkar in infiamna a ngaihpawimawh zia a tichiang hle a ni, a ti a. “Mizote chu hnam hrisel leh fit kan nih theihnan Mizoram Sawrkar in hma a la mek a, taksa leh rilru a fit a, hnam zahawm kan nih theihna turin mimal, chhungkua, khawtlang leh Sawrkar kan tan ho a tul a ni” a ti.

Rilru leh taksa a fit theih nan ei leh in ah fimkhur a tul hle a ni tiin Pu Robert Romawia Royte chuan Mizo thalaite zu leh drugs in a tibuai nasa chu runthlak a ti hle a, duhthlanna an thlan dik tawk loh vang a ni tiin duhthlanna diklo thlan vanga thlenna tur thleng phak lo an tam hle a ni, a ti. Mizo thalaiten rilru thar pu a thalai tamtak suattu ruihhlo chu do theuh tura sawmin “Tha taka bul tan chu a chanve zo tluk a ni” (A well beginning is half done) tih chu hre reng turin a chah a; kawng dik leh tha chauh zawh turin leh nitin thutlukna siam kawngah fimkhur hle turin kalkhawmte a chah a ni.

Khuallian Pu Robert Romawia Royte chuan tunlai khawvelah thudik leh dik tawklo thliar thiam a tul hle a ti a. Social media a inziak naran leh mi thusawi chhawn ringawt awih mai lovin a dik leh dikloh finfiah (fact check) a pawimawh em em a; Mi tana hriat tlakloh information petu ah tang lo turin leh social media hmang sualtu ni lo turin college naupangte a fuih bawk.

Minister chuan thalaite chu an ngaihsan zawng te (value orientation) pawh a danglam chho tial tial chu lawmawm a ti hle a, ngaihsan tur dik tak ngaisang a, sual hua a do ngam turin leh dawt hnualsuat ngam turin a fuih bawk. Mahni thawhchhuaha hlawhtlinna rah chu a thlum bik thu sawiin; Retheihna chu hlawhtlinna daltu a hmang lovin harsatna hrang hrangte chu tumruhna petu ni zawk se a ti a, retheihnate chu mi hlawhtlinga chherchhuaktu an ni fo zawk a ni, a ti. Mahni harsatna theuhte hneh a, dingchhak thinte chu hnehtu diktak an ni tiin ram leh hnam hmasawnna turin mahni thawhchhuah ngei a dingchhuak tu ni theuh turin a fuih hlawm bawk a ni.

Khuallian chuan Mizo te chu a chhe zawng hlira in sawi tawh lovin, thatna lai inhmuhsak a, in fak tawn a, intichak tawn theuh turin a duh a. A eng zawnga thil thlir thin tu ni tura chahin ram hmasawnna kawngah theihtawp chhuahpui turin kalkhawmte a sawm bawk a ni.

Vawiin a Govt. Aizawl North College ‘33rd Annual College Week Closing Function’ hi Students’ Union Leaders (2022-2023) te huaihawt a ni a, Professor S. Haukhanlian Mate, Principal GANC pawhin thusawi tawi a nei bawk. Programme hi Session 3-a then niin Miss and Mister contest bakah Beat contest te neih a ni bawk.