1075/2024-2025

Dated Serchhip, the 5^th July, 2024: Vawiin khan Serchhip Auditorium, Field Vengah Mizo Zirlai Pawl (MZP) Hqrs., Serchhip buatsaihin High School Leaving Certificate (HSLC), Higher Secondary School Leaving Certificate (HSSLC) leh Mizoram University Exam result chhuaka Serchhip District chhunga Mizo zirlai ti tha chawimawina hun an hmang a. Forests Minister Pu Lalthansanga’n khuallian niin he hun hi a hmanpui.

Khuallian Pu Lalthansanga chuan Serchhip atanga HSLC, HSSLC leh Mizoram University Exam-a hlawtlingte a lawmpui a; zirlaite, zirtirtute leh nu leh pate thawhrimna rah a ni, a ti. Minister chuan zirlai kalkhawm te fuihin an nunah hlawhtlinna chauh ni lo, chona leh hlawhchhamna an hmachhawn hun a awm ngei ngei dawn a, hlawhchhamna hi hlawhtlinna kalkawng a ni tih hria a beidawng lo turin a fuih a. Zirnaah tan la a, Hindi thiam kawngah pawh hmasawn tum tura fuihin Pu Lalthansanga chuan “Hindi thiam hi vaina a ni loa, kan ram tan Hindi kan thiam a ngai a ni”, a ti.

Kalphung thar sawrkarah mi tin tan hmun a awm tiin Pu Lalthansanga chuan mi taima leh thahnemngai te tan sawrkarin bana kaih ‘hand holding policy’ a siam thu a sawi a. Thalai lehkhathiamte zingah sawrkar hnaa innghat lova, mahni kea din tumten harsatna an tawh dan an zir chian thu leh chuta an hmuhchhuah chu sum leh pai bultanna tur financial support ah harsatna lian tak an nei tih an hriat thu Minister chuan a sawi a. Heng mite tan hian sawrkar chuan kawngkhar zau takin a hawng ta a, an thiamna hmangin Zoram a kang dawn a ni, a ti.  Sawrkarin kal tumdan a neih chu - Zoram rorelna in sang berah Pathian lalram lo thleng rawh se, tih a ni a, a hlawhtlin theih nan tan an lak mek thu leh Jail pawh misual tanna hmun ni loin mi fel siamna hmunah siam an tum thu Pu Lalthansanga chuan a sawi a ni.

MZP, Serchhip Headquarters buatsaih Mizo zirlai ti tha chawimawina hun hi an Adviser Pu Kapliana Pachuau chuan a kaihruai a. Pu C.Lalhmingsanga, AGS, MZP General Headquarters leh Pu Vanlalchhunga, Adviser, MZP Hqrts. Serchhip te pawhin fuihna thu an sawi a. Pu Vanlalzawna, Secretary MZP Hqrs. Serchhip chuan report a pe bawk.

Vawiina Mizo zirlai ti tha lawmpuina hlan tak te hi mi 45 an ni a. Mizoram University Examination, 2024 ah Government Serchhip College atangin Department of Chemistry a palina (4th rank) hauh tu K.Lalrindiki, pakuana (9th rank) Lalrampari te bakah HSLC exam a pasarihna dinhmun luahtu Goodwill English Academy zirlai Zomuansanga te leh Distinction a pass chhuak te chawimawi hlan an ni. Hei bakah hian result chhuak taa zirlai 100% pass nei thei school Marian High School hnenah lawmpuina hlan a ni bawk.