1074/2024-2025

Aizawl dated 4th July, 2024: Vawiin chawhnu a State Institute of Rural Development & Panchayati Raj Staff Welfare Association General Body Meeting, SIRD & PR Auditorium, Durtlang Leitan, Aizawl a neih ah Prof. Lalnilawma, Minister, Rural Development Department chu khuallian a ni a. Er. C. Lalthlansanga, President, Staff Welfare Association chuan hun kaihruaiin SIRD & PR, Durtlang Leitan a thawktute leh Extension Training Centre Pukpui, Thingsulthliah, Kolasib leh District Panchayat Resource Centre Serchhip, Champhai, Mamit, Lawngtlai leh Saiha-a thawktute he hun ah hian an tel a ni.

Rural Development Minister Prof. Lalnilawma chuan Mizoram a State Institute of Rural Development & Panchayati Raj din a nih dan sawiin thingtlang lam tih hmasawnna hmanraw tangkai tak a nih thu a sawi a. Thingtlang khawsak dinhmun chawikang tur a mawhphurhna kan neih te chu chona ang a ngai a, phur tak a thawk turin Staff Welfare member kalkhawmte a fuih. Rural Development Minister chuan Extension Training Centre leh District Panchayat Resource Centre-te chu mipuiin thiamna hmantlak an zirchhuahna hmun atan a ruahman a nih angin khawtlang hmasawnna thlen thei tur mi tangkai chherchhuah tum turin thawktute a chah a. Kan theihna zawn theuh ah midang tanpui tur a kan inpeih reng a pawimawh thu a sawi bawk a ni. Prof. Lalnilawma chuan SIRD & PR Staff Welfare Association-in kokim tak a General Body Meeting an nei thei chu lawmawm a tih thu sawiin mipui tan a rawngbawltu an ni tih hre reng turin leh thawhhona tha tak nei zel turin duhsakna a hlan a ni.

Chawhma hun ah hian Staff Welfare Association hruaitu thar thlanna leh rorelna hun hman niin SIRD & PR Staff Welfare Association inkaihhruaina Dante ennawn a ni a. SIRD&PR, Durtlang Leitan, ETC leh DPRC hrang hrang a thawktute Welfare Association pakhat a inchhunkhawm hnu a General Body Meeting hmasa ber a ni. Kum 2024-2025 chhung a hruaitu tur thlanchhuah te chu;

1. Er. C. Lalthlansanga

2. Tv. Benjamin Vanlalruata

3. Pu Zothantluanga

4. Pu Lalthanmawia Ralte

5. Dr. Lalhruaitluangi Sailo

6. Pu Lalchhandama Lailung

Chawhnu hun ah hian Pi Ethel Rothangpuii, Director, SIRD & PR Mizoram hnen atangin hmalakna hrang hrang te ngaihthlak a ni a. SIRD & PR Faculty te chu intuaihriam reng tur a chahin Centre tin atangin Research tangkai kalpui theuh turin leh ram leilung hausakna humhalh kawng ah zirtirna kalpui uar turin a chah a ni. District hrang hrang a thawktute atangin ETC leh DPRC dinhmun leh hmachhawpte PowerPoint Presentation hmangin tarlan a ni a. Dr. Khawlsiamthanga Khawlhring, Associate Professor, SIRD&PR chuan lawmthu sawina hun a hmang bawk a ni.