1073/2024-2025
Aizawl the 4th July, 2024: Mizoram sorkar chuan inthlan laia mipuite hnena a intiamna angin 28th December, 2023 khan CBI te hnenah General Consent a lo pe tawh a.
Tun hnaiah hian 1st July, 2024 khan India ram puma hman turin Criminal Law thar - Bharatiya Nyaya Sanhita, 2023 chu a lo chhuah tak avangin, chumi zulzui chuan Department of Personnel & Training, Ministry of Personnel, Public Grievances & Pensions chuan CBI-in a chhui theih tur offence hrang hrang te chu a tharin a rawn chhuah leh ta a. Hetianga dan thar hnuaia CBl-in offence a chhui theih tur a thara an rawn chhuah leh tak avang hian State sorkar-in a hmaa CBI hnena General Consent a lo pek kha pek thar leh a lo ngai ta tih Director, CBI-in State sorkar a rawn hriattir a. General Consent State sorkarin a pek dan tur pawn ruahman sa a rawn dah tel bawk a. Director, CBI-in State sorkar ina CBI hnena General Consent a pek dan tur a ruahmanna a rawn siam ang thlapin 27th June, 2024 khan Mizoram sorkar chuan CBI hnenah General Consent a pe thar leh ta a, Official Gazette-ah 1st July, 2024 khan chhuah nghal a ni.
Hetianga a thara Mizoram sorkarin CBI hnena General Consent a pek leh a ngaihna chhan chu sawi tawh ang khan dan thar hman a lo ngaih tak vang a ni. Tun hma a Mizoram sorkarin General Consent a lo pek leh tuna a pek thar leh hi thil thuhmun reng a ni a, sorkar chu a dinna ngaiah a la ding reng a ni.
