4934/2025-2026

Dated Serchhip, the 20th March, 2026 : Vawiin khan Mizoram Civil Pensioners’ Association, Serchhip District Headquarters chuan Serchhip Kawnpui VC Hall ah General Conference an hmang a. Serchhip DC Pu Paul L. Khuma chuan khuallian niin a hmanpui.

Khuallian chuan Pensioner te chu Pathian malsawmna dawnga pension thlenga an hna an thawk thei leh tun thleng maia damna tha an nei chu a ropui a tih thu a sawi a. An thawh rahah an tu leh faten vawiin kan lo hman theih phah a ni, a ti. Hun tam tak an lo paltlang tawhte leh an tawnhriatte pawh midang tan a hlu em em a, khawtlang leh chhungkaw tana mi hlu an ni a ti bawk. Kan khawtlang nuna harsatna kan tawh tam tak laimu chu kan chhungkuaah a ni a, pensionerte chu hun thawl ngah zawk an nih angin tawngtaina nen min beih sak rawh u, tiin a sawm a ni.

Pawl hlu taka memberte chu tang ho zel tura chahin mahnia tih theih loh hi pawl ang chuan tih theih a ni mai thin a ni tiin, hriselna tha nei a, khawtlang ti mawitu ni zel tura chahin, tuna sawrkar hnathawkte pawh tawngtai sak zel turin a sawm a ni.

Serchhip District Headquarters Secretary Pu R. Lalhnuna chuan report pein an pawl chu pensioner thahnemngai ten April ni 1, 1999 an din a nih thu a sawi a. Tunah hian Serchhip District Headquarters chhungah member 1000 bawr vel awmin, branch 10 an awm thu a sawi bawk.

MCPA Gen Headquarters Secretary Pu F. Lalrinawma pawhin thusawiin pensioner te zingah harsatna in a tlakbuak te hnenah Endowment fund pek thin a nih thu sawiin, Serchhip District Headquarters member mi 6 hnenah Endowment fund Rs. 4000 theuh a hlan nghal a ni.

He hun hi Serchhip District Headquarters President Pu Lalzuiliana’n a kaihruai a. Chawhnuah hruaitu thar thlanna hun an hmang a ni.