2111/2025-2026

Dated Serchhip, the 11^th September, 2025: Mizoram Cleanliness Competition 2025 chu Serchhip District ah Bawrhsap Pu Paul L Khuma’n bul a tanpui a. Vawiin khan hemi pual hian Serchhip DC Pisapui Hall-ah inkhawm buatsaih niin khawtlang hruaitu VC te, tlawmngai pawl hrang hrangte, zirna school te leh sawrkar official te an tel.

“Pathianin min pek kan ram hi, tha taka enkawl leh ven hi kan mawhphurhna a ni”, tiin Serchhip DC Pu Paul L Khuma chuan Mizoram Cleanliness Competition 2025 hawnna inkhawma khawtlang hruaitu leh tlawmngai pawl kalkhawmte chu Pathianin mawhphurhna a pek an hlenchhuak em tih inzawt turin a chah a.  Kan khua leh kan veng tihfai hi sawrkar kutah chauh dah chi a ni lo a, mi tinte mawhphurhna a ni, DC chuan a ti. Serchhip District hian lawmman pakhatna vawi hnih lai a lo dawng tawh a, amaherawhchu, kum kaltaah pathumnaah a tlathla chu pawi a tih thu sawiin nasa lehzuala tang turin District mipuite a fuih a. School leh zirna in dangte pawhin kar tin Cleanliness Drive nei se, khawtlang pawhin a tam thei ang ber faina hnatlang  nei thin se a duh thu a sawi a. Fai hi a Pathian thu a, khua leh tui tha nihna a ni a, hriselna min petu a ni tih hriain faina chu a taka nunpui theuh turin DC Pu Paul L Khuma chuan mipuite a chah a ni.

Vawiin programme kaihruaitu District Urban Development Officer (DUDO) Pu Gaston Vanlalhriatpuia chuan faina inelnaa Serchhip dinhmun tlangpui a sawi a. Kum 2017-ah Mizoram Cleanliness Competition neih tan niin Serchhip chu 5-na a ni a; 2018 ah 2na, 2019 ah 1na, 2020 ah 4na, 2021 ah 5na, 2022 ah 3na, 2023 ah 1na, 2024 ah 3na a ni. SBM (U) hnuaiah kumin July thla khan Safai Apnao, Bimaari Bhagao 2025 campaign neiin kawngsira tuiluan kawr te leh hmun tawp lai te an tifai a. Clean hands leh Clean homes campaign an kalpui a, Cleant Toilets Campaign te pawh kalpuiin vantlang inthiarna hmun te an tifai a ni. Serchhip hian kumin August thla atang khan ODF Plus nihna a dawng tawh bawk a ni.

Mizoram Cleanliness Competition 2025 ah hian Serchhip District chuan District dang 9 a inelpui dawn a. Tehna hrang hrang 17 hmanga endik an nih dawn bakah Powerpoint Presentation an pek hmanga inel a ni dawn bawk a. December 2025 atanga January 2026 chhungin endiktute an lo kal anga. Republic Day 2026 denchhenin result puan a ni dawn a ni.