No.3750/2021-2022

Aizawl the 21st January, 2022: Vawiin hian Serchhip District chhung hmun hrang hranga awm Police ten an din cham kum 50 na (50th Mizoram Police Raising Day/ Golden Jubilee) chu hlim takin Serchhip SP Conference Hall ah an hmang.

He hun hi Pu Kaste Romalsawma, MPS, SDPO in kaihruaiin Serchhip district chhunga Police dinhmun tlangpui leh tun hnaia hnathawh langsarte a tarlang a. Pu Vanlalnghenga, MPS, Addl. SP in Mizorama Police lo awm tan dan tlangpui sawina neiin, sawm bikte atangin Pu K. Saitluanga, MIS, DIPRO leh Police Pension tawhten thusawina hun an hmang leh a ni.

Tunah hian Serchhip district chhungah Police post awmzat hi 145 niin thawktu 103 an awm mek a, Serchhip, Thenzawl leh N. Vanlaiphaiah Police Station awmin Chhingchhipah Outpost a awm a. Kum 2021 chhungin District chhungah Case 111 ziahluh a ni a, thil tisualtu mi 121 man niin case 111 zinga case 93 te hi Charge sheet tawh, Court a thawn vek tawh an ni. Case 9 te chu finfiahna tha tawk awm loh avangin final report siama tihtawp an ni thung a, case la chhui zui lai 9 a awm bawk. Kum 2021 chhung hian thih dan pangai lova thi (unnatural death) case 11 ziahluh a ni a, an zinga a tan ber hi inawkhlum niin, tuia tla hlum leh tukverh atanga tlate pawh an awm a. Dan lova Kuva phurh bag 1340 man niin a phurhna lirthei 13 man a ni a, dan angin Custom Department lamah hlan an ni. Silai chi hrang hrang 10 leh a mu 27465 zet man a ni a, a neitu nia puhte pawh dan angin Court ah thawn an ni. Kum 2021 chhung vek hian Mizo siam zu litre 2737 leh Sap zu/Beer um 8 man a ni a, zu man zawng zawng hlut zawng hi Rs. 3,25,450 vela chhut a ni. Ruihhlo kaihhnawih (ND&PS Act) dan bawhchhiatna case 9 ziahluh niin damdawi man hlut zawng hi Rs. 3,29,500 a ni a, damdawi kaihhnawihah hian mi 14 man an ni. Nikum chhung vek hian naupang kum tlinglo mipat hmeichhiatna hmanpui (POCSO Act) thubuai 7 ziahluh a ni a, Serchhip district ah hetiang lam hawi case a tam bik nia sawi a ni. Hetiang sualna hi a tenawma, a hremna pawh a na hle. Chhungkua leh inlaichin hnai takte inkarah a thleng tam bik a kan fimkhur hle a tul a ni.

Kum 2021 chhung vek hian Covid19 himna dan bawhchhia mi 585 zet Police ten manin an lei chawi tir hi Rs. 76,000 a ni a, Motor Vehicle Act dan bawhchhia mi 351 manin an pawisa chawi tlingkhawm hi Rs. 1,38,790 a ni bawk.

Kum 2021 chhunga case harsa tak panga chhui chhuaktu ASI Michael Lalremsanga chu Police Headquarters in Good Service Mark a pe a, ASI R. Vanlalfinga leh ASI Vanlallawma te pawhin case harsa tak pakhat darkar 24 chhunga an chhuichhuah avangin DGP Cash Reward an dawng a. Tin, Police parukten an thawh that avangin Commendation an hmua, Appreciation hi vawi 165 zet hnathawktuten an dawng hman bawk a ni.