No.3751/2021-2022

Aizawl the 21st January, 2022: Vawiin chawhma dar 11:30 khan Hnahthial District Executive Force (DEF) in Mizoram Police Kum 50 (Golden Jubilee) a thlen hriatrengna lungphun chu Pu Lalbiakkila, Superintendent of Police Hnahthial in Hnahthial Police Station-ah a hawng.

Jubilee pual lungphun hawnna hunah hian Hnahthial-a awm mek Police thawktute, police pensioner leh media te an tel a ni. Hnahthial District Hospital Poor Fund leh Jehova Jire Home-ah Jubilee pualin tanpuina Rs. 2000 ve ve an hlan bawk a ni.

Lungphun hawnna inkhawm Pu Bijoy Gurung, Addl SP kaihhruaiah thu sawiin Hnahthial SP Pu Lalbiakkila chuan Mizoram Police in Golden Jubilee kan thleng hi a lawmawm hle a, ni 21 January 1972-ah Assam Sorkar hnuaiah Mizo District chu Union Territory-ah hlan kai a ni a, Assam Police-a Mizo awm mekte chu Mizoram Police-ah leh a ni a, Kum 50 chhung hian Mizoram Police chuan hna thawh that avangin medal tam tak kan dawng tawh a, hetih lai hian Mizoram Police mi 56 te chuan an hnathawh hlenchhuahna atan ram leh hnam tan an nunna hlu tak pein an martyr tawh a ni, a ti.

Hnahthial SP chuan Golden Jubilee kum 50 kan lo tling ta a, kum 50 chu mihringah pawh eng thilah pawh a puitling tawh a ni. Mizoram Police pawh kan puitling tawh, ram leh hnam tana Department ropui ber te zinga hna kan thawk hi lawm tur kan ni a, kan lawmna erawh kan hnathawhah te, kan nitina duty-naah lantir ila, he kan Golden Jubilee hi inpek tharna atan hmang ila ka duh a, Police lam pum te pawh ngaihtuah nawn thar leh theuh ang u, inhlan tharna nen he Jubilee hi kan lawm a tul a ni tiin Police-ah thutiam neia lut kan nihna te pawh vawiin hian i hre thar leh ang u a ti bawk.

Hnahthial District Executive Force dinhmun tarlangin SP chuan Police awm tura tih hi Police 117 a nih laiin mi 54 an awm mek a, post hnawh khah loh 63 a awm a, 2nd batallion MAP atangin 25 an awm bawk a, tun dinhmunah Police 79 kan awm mek a ni a ti. Mizoram Police dinhmun sawiin SP chuan Mizoram Police hnuaiah District Executive Force 11, Police Sub-Division 18, Police Station 38, Special Police Station 3, Cyber Crime Narcotic leh All Women Police Station, Police Outpost 16, Armed Batallion 3, Indian Reserve Police Batallion 5, BOP 23, Police Training School 1 leh Police Unit pawimawh dang (MPRO, Security, Traffice, CID, Crime Special Branch) 5 a awm mek a, report thar bera a lan danin Mizoram Police-ah hian awm tura tih 12,206 a nih laiin Police tang mek mi 8,342 kan awm a, post hnawh khah loh 3,864 a awm a, hei hi za zela chhut in 31.66% a ni a ti.

Attachment

  • Loading attachment...