1829/2023-2024

Dated Serchhip, the 11th September, 2023: Vawiin chawhnu dar 1:30 khan Govt. Higher Secondary School Hall, Serchhipah Mizoram State Anti Tobacco Day vawi 10-na hman a ni a, Pu Lawmawma, District Education Officer, Serchhip District chu khuallian a ni.

Khuallian chuan, vaihlo leh a kaihhnawih hrim hrim hi zirna in atanga 100 yard ah zawrh phal a nih loh bakah school campus chhungah tih phal ani lova, zirtirtute zingah ti thin an awm em tih endik a ni thin dawn a ni, a ti a. Serchhip District chu India ram district zawng zawngah lehkha thiam tamna ber kan nih avangin phai lama mithiamte pawhin rawn tlawh an chak thin a, hmun dang amite hmuhah lehkha thiam tam ni mai lova thiamna tak tak nei tura hmasawn turin tan lak kan ngai a ni, a ti bawk.

Zirlaite chu ngun taka ngaihtuahna senga, thil thalo ti thin an awm chuan bansan mai tur anih thu sawiin, thalai kan nih chuan kan taksaah nghawng ala neilo niin kan hre mai thei a, mahse, a rei hnuah erawh chuan kan taksaah nghawng thalo tak alo lang chhuak dawn a, chumi a thlen loh nan chuan zirlai duhawm tak takten zuk leh hmuam hi thil thalo tak a ni tih hria in, rilru leh ngaihtuahna a khawih buai hma in, a ti ngailo ten tichhin hauhlo tur leh lo ti tawh an awm pawha bansan turin a sawm a; Zirtirtute pawh naupangte hmuha mei an zuk chuan ti ve rawh u, an tihna tluk a nih avangin bansan turin a chah bawk a ni.

Dr. LP Malsawma, Sr. Chief Medical Officer, Serchhip District chuan tun dinhmunah Mizoram hi India ram puma vaihlo hmang nasa ber dawttu leh harsatna tuar nasa ber State kan nih mek thu a sawi a. Vaihlo leh a kaihhnawih that lohzia hi thahnemngai tak leh theihtawp chhuaha mipuite zirtirna pek mek zel niin hmasawnna lawmawm tak a awm thu a sawi a. Heng hmasawnna te hi sawrkar hnathawkte bakah mi thahnemngaite tanpuina leh hmalakna vang a nih thu sawiin, lawmthu a sawi bawk a ni.

Vaihlo in Mizote min run nasat zia leh min thihchhiat nasat zia hriain kum tinin Mizo mipuiten vaihlo-zuk leh hmuam dona lama hma kan sawn zual zel theih nan September ni 11 hi Mizoram State Anti Tobacco Day-a hman a ni thin a. Kuminah hian “Towards 100% Tobacco Free Educational Institution” tih chu thupuiah hman a nih thu a sawi bawk a ni.

Dr. Lallawmkimi Chhakchhuak, DNO, NTCP pawhin thusawiin, vaihlo leh a kaihhnawih hi khawvela thihna thlentu lian tak niin kan thih hun tur aiin hmaa min thih tirtu a ni a, taksaah natna chi hrang hrang a thlen thei a, fa neih theih lohna te pawh a thlen thei a ni, a ti a. India ramah Mizoram chu vaihlo leh a kaihhnawih hmang nasa ber dawttu kan ni a, zirchianna atangin Zirlai naupang vaihlo leh akaihnawihin a tihbuai 58.7% lai an nih thu a sawi bawk. School engemaw zat Tobacco Free Educational Institution-a puan an nih tawh thu sawiin May ni 31, 2024 hma in za-ah za ngei thei tura tang tlang turin kalkhawmte a sawm a, nghei duh an awm chuan Tobacco Cessation Clinic pan sela, an tanpui theih reng thu a sawi bawk.

Pi K. Hmingthansangi, District Consultant, NTCP chuan report pe in, kumin chhungin Tobacco Cessation Clinic pantu mi 124 awm tawhin, an zinga mi 15 in vaihlo leh a kaihhnawih an bansan tawh a. Zirna in hrang hrang 74 ah hun hman tawh niin, zirna in 19 chu Tobacco Free Educational Institution (ToFEI) ah puan an ni tawh a. Anti Tobacco Squad-te tum 13 fe chhuakin dan bawhchhia mi 43 an man a, an pawisa chawi tlingkhawm chu Rs. 2050/- a nih thu a sawi.

He hunah hian Mizoram State Anti Tobacco Day puala College zirlaite tana Slogan inziahsiakna lawmman sem nghal niin lawman dawngtute chu 1-na Lalmuanawmi, Dept.of Mizo, 2-na F. Zonunsanga, 1st Semester leh 3-na Lalmuanawmi, 5th Semester te an ni a, lawman pawisafai leh thuziak chu khuallian hian a hlan a. Vaihlo leh a kaihhnawih laka fihlima tura intiamna, Pu C. Lalrempuia, Social Worker, NTCP kaihhruaia neih a ni a, Pu Lalramnghaka’n lawmthu sawiin hun a khar a ni.