No.7318/2020-2021

Vawiin hian National Voters’ Day vawi 11-na chu ramchhung hmundangte rualin Serchhip District-ah hman niin Serchhip-a he ni puala inkhawm buatsaih chu Pu Kumar Abhishek, IAS, District Election Officer chuan khuallian niin a hmanpui a ni.

Khuallian chuan National Voters’ Day chu January 25, 2011 atangin India rampumah hman thin a nih thu leh he ni hi Election Commission of India (ECI) din champha a nih thu a sawi a. National Voters’ Day chu India khua leh tui, kum 18 tling chinte tan Electoral Roll-a inziahluh a pawimawh zia inzirtirna atan te, Vote nei thei ten kan aiawh thlang tura inthlanna-a Vote thlak a pawimawh zia inzirtirna atan te hman thin a nih thu a sawi. Election Commission of India chuan India rama kan aiawha roreltu tur MP Lok Sabha, MP Rajya Sabha leh State Assembly Member thlanna te a buatsaih thin thu sawiin, tunhnaiah pawh State thenkhat inthlanna chu hri leng karah hlawhtling taka buatsaih a nih thu a sawi a. Hetianga mipui ten kan aiawha roreltu tur kan thlan theihna tura thawktute zawng zawng chungah lawmthu a sawi a ni.

He hunah hian Pu Vanlalhmachhuana, MCS, Election Officer chuan E- EPIC chungchang sawifiahin E-EPIC hi tun atang hman tan nghal tur a nih thu leh E-EPIC ah chuan Electors ten EPIC Card kan hman thin chu pdf Format (digital format)-a kalpui a nih tawh dawn thu a sawi a, a hmasa ber atan tun thla chhungin Electoral Roll Revision hnuhnung bera Vote nei thar te tan download theih a nih dawn thu leh hemi hnu hian Vote nei zawng zawngte tan download theih tura ruahman a nih thu a sawi bawk.

Thenzawlah pawh National Voters’ Day hi hman niin khuallian Pu Kulothungan, IAS, SDO(C) chuan Vote thlak chu Voters te mawhphurhna a nih avangin vote nei thar te chuan ngaipawimawh turin a chah a, tin, vote nei thei te enrolment buaipuitu khaw tina BLO te inpek chu fakawm a tih thu a sawi a ni.

Vawiina he hun hman hi Pu Lalmuansanga Ralte, MCS, Addl. DC chuan kaihruaiin, Pi F. Lalnisai, SDC kaihhruaina hnuaiah he huna tel te hian Voters’ Pledge an chhamrual a, kumin-a Electoral Roll-a thun thar mi 10 te hnenah EPIC semchhuah nghal a ni bawk.