3962/2024-2025

Serchhip dated the 25th January, 2025 : National Voters' Day vawi 15-na chu vawiin khan Serchhip DC Pu Paul L.Khuma, District Election Officer ni bawk hovin Serchhip DC Pisapui Hall-ah hman a ni.

Khuallian Pu Paul L Khuma chuan Election Commission of India din tan ni champhaphak denchhenin kum 2011 atangin National Voters’ Day hman thin a ni, a ti a. “He Ni-in kan thinlunga tuh a tum ber chu democracy ropuizia, thatzia leh hlutzia min zirtir a; vote nei zawng zawng ten inthlan apianga vote thlak duhna thinlung kan put hi a ni”, a ti. DC chuan ram hruaitu tha thlang tura vote hlu tak kan neih hi ngaihtuahna fing tak hmang chungin kan khua, kan district, kan ram hmangaihtute kan thlang tur a ni, a ti a. Ram hruaitu tha lo chuan keimahni chuah ni loin, kan fate leh kan tute thleng pawhin a nghawng thei a ni tih hria a kan vote hlu tak hi ram hruaitu tha thlan  nan thlan nana hmang theuh tur leh, inthlan apianga vote thlak zel turin kalkhawmte a fuih a ni.

Programme hi Election Officer Pi Pi F Lalnisai chuan kaihruaiin Additional DC Pu Lalrinzuala’n kalkhawm te lawmna thu a sawi a.  Dr Marilyn Lalruatkimi SDC kaihhruaina hnuaiah kalkhawmten 'Voter Thutiam' an chhamrual a. Khuallian Pu Paul L. Khuma chuan kum tling thar, Electoral Roll a thun thar te hnenah EPIC Card a sem a ni.

National Voters Day denchhenin nimin khan Serchhip DC Office chuan SVEEP kaltlangin Government Higher Secondary School, Serchhipah Voters Awareness cum Quiz Competition an lo buatsaih tawh bawk a. National Voters Day chungchang te, thalaite tel ve a tulzia inzirtirna te leh voters te hlutna leh mawhphurhna inzirtirna neih a ni.

Kumina  National Voters' Day thupui hi “Nothing like voting, I vote for sure” tih a ni a. Serchhip District chhunga Block pahnih - Thenzawl leh N Vanlaiphaiah te hun hman a ni bawk.

Vawiin Serchhipa programme buatsaihah hian vote nei thar mi engemawzat te bakah Block Level Officer te, political party te, khawtlang hruaitute, tlawmngai pawl hruaitute, MJA hruaitute leh sawrkar official te an tel a ni.