3963/2024-2025

Aizawl, the 25th January, 2025: Vawiin khan Mizoram Governor Gen (Dr) Vijay Kumar Singh PVSM, AVSM, YSM (Retd) hovin National Voters’ Day 2025, a tum 15-na State huapa lawmna pui ber chu Assembly Conference Hall-ah neih a ni a. Governor hian National Voters’ Day pual thuchah a sawi bakah vote nei tharte hnenah EPIC a hlan a, Aizawl District chhunga Booth Level Officer hnathawk tha zualte hnenah BLO Award a hlan nghal bawk.

Khuallian ni a he hun hmanpuitu Gen (Dr) Vijay Kumar Singh, PVSM, AVMS, YSM (Retd) chuan Election Commission of India chu India rama democracy tundin leh chhawmnun zel kawnga hmalatu pawimawh tak, a innghahna lungpui leh tha tichaktu a nih thu sawiin, "A tul ang zelin a inherdanglam ve zel a, inthlanna felfai, muanawm leh tute tan pawha khairual tak hmingtha takin a buaipui thin a, India ram kilkhawr ber thlenga inthlan nana EVM hman a ni  chu hmalakna huai leh khawvel fak rawn a ni, a ti. India chu khawvel puma democracy hlawhtling ber tia hriat hlawh a nih mek thu leh India Danpui duhdan angin inthlanna felfai leh muanawm tak neih a ni thin tih sawiin, democracy hlawhtling leh thang duang tak kan ni hi ram buaiin a chim mek thenawm ramte awhrawn a ni, a ti bawk.

Governor Gen (Dr) VK Singh chuan Mizorama Lok Sabha Inthlanpui 2024 hlawhtling tak buaipuitu CEO, DEO leh Official zawng zawngte chhuanawm a tih rualin, inthlan buaipuitu zinga Police 5 te'n nunna hlu tak an chan erawh pawi a tih takzet thu leh an inpekna chu ropui a tih thu sawiin, State Sawrkarin ralna sum cheng nuai 15 theuh an chhungte hnena a hlan thu a sawi a. Mizoram mipui vote nei thei tawh phawtte chu electral roll-a inziaklut vek tur leh vote thlak ngaipawimawh tura sawmin, vote thlak hmanga Sawrkar inrelbawlnaa tel tum theuh turin a chah nghal bawk.  

He hunah hian Er. Lalhriatpuia, District Election Officer, Aizawl District chuan inlawmna thu a sawi hnuah Pu Rajiv Kumar, Chief Election Commissioner of India thuchah thlira ngaihthlakho a ni a. National Voters' Day pual thutiam sawirualna RK Rinsanglura, Class XI, Commerce, St. Joseph Higher Secondary School  kaihhruaiin neih a ni a. Pu Madhup Vyas, Chief Electoral Officer (CEO), Mizoramin thu a sawi hnuah EPIC leh BLO Award sem niin, Pu James Lalnunmawia, Jt. CEO in lawmthu sawiin hun hman hi a khar a ni.

Aizawl District chhunga Booth Level Officers (BLOs) hna thawk tha zual thlanchhuah lawmman hlante: 

1. Lalsangzuala, Teacher, Govt. Tuisualral H/S (7/8-Sakawrdai II) 

2. Lalzabiaka, Teacher, Govt. Model Comprehensive School (10/26-Chaltlang V)

3. Lalrinngheti, Teacher, Vaivakawn H/S (11/20-Aizawl Venglai II) 

4. R. Zothansangi, Teacher, Govt. M/S Edenthar (12/1-Edenthar I)

5. Joseph Zothanpuia, Teacher, Falkland UPS (13/16-Falkland)

6. Lalhmachhuani Ralte, Teacher, Govt. P/S-I,

Chhinga Veng (14/13-Chhinga Veng V)

7. R. Lalawmpuia, Teacher, Chawlhhmun H/S (15/16-Chawlhhmun IV) 

8. M.C. Lalthianghlima, Teacher, Govt. Kanan M/S (16/7-Kanan IV)

9. Lalrammawia, Headmaster, Govt. Hualngohmun M/S (17/5- Maubawk IV)

10. Lalmuankima Pachuau, Teacher, MICE (18/15- Venghlui III)

11. Laltlanthanga, Teacher, P/S-II, Tlangnuam (19/27- Tlangnuam I)

12. Lalparliana Ralte, Teacher, Govt. P/S Phulpui (20/16- Phulpui) 

National Voters' Day hi January ni 25, 1950 a din Election Commission of India (ECI) dinchampha pualin kum tin January ni 25 ah hman thin a ni a. Voter-te hnena inthlan kaihhnawih pawimawhte hrilhhriat nana hman thin a ni a, kumin hian thupui atan 'Vote thlak tluk a awm lo, Vote thlak ngei ka tum e' tih hman a ni.

Kumin January ni 6 a Final Electoral Roll, 2025 tlangzarh takin a tarlan dan chuan Mizoramah vote nei mi 8,69,813 an awm a. Heng zinga 4,20,888 te hi mipa niin, hmeichhia 4,48,925 an awm bawk.