3964/2024-2025

Lawngtlai, the 25th January 2025 : India ram hmun dangte rualin vawiin chawhma dar 11:00 khan District Election Office, bultumin Deputy Commissioner Conference Hall, Lawngtlaiah "National Voters' Day 2025" hman a ni a. Pu Cheemala Siva Gopal Reddy, IAS, District Election Officer (DEO) chuan he hun hi a hmanpui.
Pu Cheemala Siva Gopal Reddy chuan National Voters’ Day 2025 - chibai bukna nei hmasain, India khua leh tuite tan ni pawimawh tak a nih thu a sawi a. Khua leh tui tha ni turin Vote thlak a pawimawh hle tih tarlangin, a bik takin  vawikhat nân a vote thlak tur ( First time voter ) te chu an dikna chanvo ngai hlu a vote thlak ngei ngei turin a chah a. DEO chuan kum 18 tling tawh, electoral roll- a la chuanglo te pawh inziaklut thuai turin a sawm  a ni.
District Election Officer (DEO) chuan Democracy chu India ram innghahna lungphum pawimawh tak a nih thu  sawiin, vote thlak lamah tan lak thar a tul hle a ti a. Ram leh hnam hruaitu tur mi tha, fel leh rintlâk thlanchhuah chu mipuite kuta innghat tlat a ni a, mipuite tan ram hruaitu thlanchhuah kawngah pawh fimkhur a tul hle a ti. District bawrhsap chuan India Danpuiin  inthliarna awm miahlo a duhthlanna chanvo angkhat a pek ngai hlu a, thahnem  ngai taka vote thlak fo thin turin kalkhawmte leh Lawngtlai district mipuite a sawm nghal.
National Voters' Day pual hian Pu Cheemala Siva Gopal Reddy (DEO) chuan vawikhat nân a vote thlak tur ( First time voter ) mi -10 hnenah Voter ID (EPIC) Card hlanna a nei a. Pi Margaret J. Vanlalremmawii, SDO ( S) kaihhruaiin, Voter Intiamkamna (Pledge) sawiho a ni bawk.

Vawiin "National Voters' Day 2025" hmanna inkhawm ah hian Election Official leh BLO te an tel thei a. Pu Collin Hlychho, Election Officer ( EO)  chuan lawmthu sawina neiin hun a khar.