3965/2024-2025

Khawzawl, dated 25th January 2025: Vawiin chawhma dar 11 khan DC Auditorium-ah National Voters' Day vawi 15-na hman a ni a, Khawzawl DC Pu K. Vanlalthiana khuallian a ni.

Khuallian Pu K. Vanlalthiana chuan thu sawiin tun kum National Voters' Day thupui "Nothing like voting, I vote for sure" sawi angin vote thlak pawimawh zia hre thar leh turin mipui a sawm a, a bikin vote nei thar te vote hlutzia hre turin leh a theihna apianga vote thlak turin chah a ni. VC inthlanpuiah hian vote thlak ngei turin a sawm bawk a, pledge sawi ang khan induhsakna leh inthliarhranna awm lovin vote thlak ngei a nih a beisei thu a sawi bawk. Mi tinin vote an thlak chuan Khawzawl district hian hma a sawn zel ang tih a sawi bawk a ni.

He hun hi Election Officer Pu Timothy R. Lalhmangaiha'n a kaihruai a, National Voters' Day sawihawnna a nei a. Hemi zawh hian SDO (Sadar) Pu Suvigya S. Chandra, IAS chuan Voters' Pledge sawihona a kaihruai a ni. Vote nei thar te hnenah EPIC (Electoral Photo Identity Card) hlan a ni a, heng hi polling station thlan bik atanga lo kal te an ni. Hemi zawh hian Chief Election Commissioner Pu Rajiv Kumar thusawi YouTube atangin ngaihthlak a ni a, SDC Pu Paul Rokima'n Mizo tawnga letlingin a sawi chhawng a. Addl. DC Pu Lalfakzuala'n lawmthu sawina hun hmangin a khar a ni.

National Voters' Day puala photography competition (thlalak intihsiakna) lawmman leh Best BLO lawmman sem a ni bawk a, heng hi lawmman dawngtute an ni.

Photography Competition

1st - Pu F. Vanlalpeka

2nd - Pi Lalsangpuii

3rd - Pu Liansangpuia

Best BLO

Rural - Pu J. Liandawla, Vantlang BLO

Urban - Pi TBC Lalrokimi, Khawzawl Electric Veng BLO

He hunah hian Khawzawl SP Pu F. Lalbiakzauva leh office hrang hrang hotute leh BLO te an lo tel a ni.