Vawiin chhun dar 12:00 khan Serchhip DC Chamber-ah Serchhip District Nehru Yuva Kendra District Advisory Committee on Youth Programme chu an Chairman leh District Bawrhsap ni bawk Pu Lalsangliana hovin an thu khawm a, Kum 2012 – 2013 Annual Plan sawi hovin an pawm nghal a ni.

He hunah hian Bawrhsap chuan hun rei tak atanga kan lo awh em em, NYK-in Serchhipah thuthmun nghet nei a hna an thawk ve tawh tur chu kan district pum tan leh a bik takin thalai te tan rahbi thar a ni a, a lawmawm em em a ni tiin NYK-in programme hrang hrang an neih te chu thalaite hmasawnna atan a tangkai hle a beisei thu a sawi a ni. Chairman chuan hlawhtlinna chu sum sen tamah a innghat lova, miin a thawhrimna, thahnemngaihna leh tumruhnaah a innghat zawk a ni tiin NYK-a thawktute pawhin thalaite chawikanna atana an sum neih te, tam tham ni lo mahse a tangkai leh daihzai thei ang bera hmang turin a chah bawk a ni.

NYK hi thingtlang thalaite ram tana mi tangkai an nih theihna tur leh an pianpui thiamna leh finna te tipung a hmasawnna kawnga kaihruaitu tura Central Sawrkarin kum 1972-a a din a ni a, Youth Club hrang hrang leh NGO te behchhana hmangin thalai tam tak tan hna an thawk mek a ni.