1950/2024-2025

6th September, 2024 : Vawiin khan Serchhip DC Pu Paul L.Khuma hoin Serchhip District a Quick Response Team training kharna inkhawm chu DC Conference Hall-ah neih a ni.

DC Pu Paul L Khuma chuan training hi a hun bi pangngai ang ni lon Additional DC Pu Lalrinzuala leh DM&R leh Sports & Youth Services Dept te thahnemngaihna avanga a bika neih a ni, a ti a. He training a hlawhtlin theihna tura ngaihtuahna leh tha leh zung sengtu zawng zawng te chungah lawmthu a sawi a ni. Trainee te fuihna thu sawiin kan hma huna chhiatna thleng thei tumahin kan sawi lawk thei lo a, chhiatna a lo thleng a nih chuan QRT te chu District mipuite tan an mawhphurhna theihtawpa hlenchhuak turin a sawm a. Hmanrua an neih loh dan te a hriatpui thu leh a tul anga ngaihtuah zel a nih tur thu a sawi a ni.

QRT Training hi September ni 2, 2024 khan neih tan niin DM&R leh Sports & Youth Services Dept atangin trainer mi 3 in kar khat chhung an awmchilh a. Serchhipa QRT a tel mi 11 ten ngawrh takin training hi an nei a. Leisekawt Field, DC Office Complex chhungah leh hmun hrang hrangah training hi an nei a ni. An training chhung hian chhanchhuahna hmanrua chi hrang hrang hman dan te, khama inchhanchhuah dan te, pulley hmanga inhnuhchhuah dan te, kham leh inchung sanga inpawhchhoh dan te, strecher siam leh hman dan te, building sang tak atanga damlo lakchhuah dan te, hmun khirh tak tak atanga chhanchhuah ngai te chhanchhuah dan te, Mizorama hman tangkai tur ang chi zawng zawng kim takin an zir a ni.

Kharna inkhawm hi Pu Zothansanga Hmar, DO, DM&R chuan a kaihruai a. Pu PC Lalchunglura, Joint Director (Ops), DM&R chuan fuihna thu a sawi a. Trainer aiawhin Moses Lalthanpui’an thu a sawi bakah trainee te atangin thusawina leh an thil zir te a taka entirna hun an hmang  a. Addl DC Pu Lalrinzuala’n lawmthu sawiin hun hnung a khar a ni.