1949/2024-2025

6th September, 2024 : Vawiin khan Serchhip DC Pu Paul L Khuma hovin Serchhip District chhunga faina beihpui Swachhata Hi Seva Campaign, 2024 kalpui dan tur relin District Steering Committee chu Serchhip DC Meeting Hall-ah an thukhawm.

Swachhata Hi Seva Campaign hi kum tin neih thin a ni a. Kumin hian kum dang zawng aia uar lehzualin, mipui mimir a tam thei ang ber tel theihna tura ruahhmanna siam a ni. He faina beihpui hian a tum ber chu kan ram, kan khua leh vengte a lo fai lehzual theih nan mipui hnena faina chungchang inzirtir te, faina kawnga a tam thei ang ber thawk chhuak tura hmalak te, hmun bal zual zawng chhuak a, tihfai hnatlang neih bakah sanitary workers te hlutzia kan hriat theih nana chawimawi te a ni a. Kumin 2024 Swachhta Hi Seva campaign hnuaiah hian sawrkar laipui chuan banpui pathum - Swachhata Ki Bhaagidari (Cleanliness Participation), Sampoorna Swachhata (Complete Cleanliness) including Swachhata Lakshit Ekayi (Cleanliness Target Unit) leh Safai Mitra Suraksha Shivir( Sanitary Workers Shivir) te a duang a ni.

Vawiin meeting hian Serchhip District a hmalakna tur hrang hrang a duang chhuak a. Veng leh khaw chhunga bal zual bik Black Spot/Cleanliness Target Unit (CTU) te chu VC te, Sanitation Committee te leh WATSAN Committee ten an zawng chhuak a nga, heng CTU te hi tihfai hnatlang neih tur a ni ang. Faina hnatlang hi VC area tinah neih a ni dawn a, veng fai/khawfai inelna buatsaih a ni dawn bawk a ni.

Sanitary workers te tan bik a thlawna inentirna Health Camp chu khaw hrang hrangah Health Department ten an buatsaih dawn a. Serchhip khawpuiah chuan DC Office tual zawlah buatsaih tum a ni.

Middle School leh Higher Secondary School te tan essay, painting leh bawlhhlawh atanga thil siam waste to art ah te inelna buatsaih a ni ang a. College kal lai te tan reels insiamsiak leh waste to art a inelna buatsaih tum a ni bawk.

Faina lama hmala tu langsar, hlawh phut hauh loa tlawmngaihna avang liau liaua mahni veng leh khua tifai thin Swachhta Warriors te chawimawina hun hman a ni dawn bawk a ni.

Swachhata Hi Seva Campaign hi September ni 14 atanga October ni 1 thleng kalpui tura ruahmanna siam niin thupui atan ‘Swabhav Swachhata - Sanskaar Swachhata' tih a ni. Hawnna program hi Serchhip town ah leh Sub Division hrang hrangah neih a ni dawn a. Kharna inkhawm chu October 2 a neih tur niin Veng/khaw fai lawmman te leh inelna hranga tithate hnenah lawmman sem a ni dawn bawk a ni.

He thutkhawmnaah hian Additional Pu Lalrinzuala bakah department hrang hrang hotute, VC, YMA leh MJA te an tel a ni.