2377/2025-2026

Dated Serchhip, the 25th November, 2025: Tukin zing khan Zoram Drivers’ Union (ZDU) Serchhip Hqrts te buatsaih Road Safety Week 2025 chu Serchhip Bazar tualah Pu Vanlaldika, District Transport Officer (DTO) Serchhip chuan hawng a. Kumin thupui atan Fimkhur la, nun chhanhim rawh tih hman a ni.

Pu Vanlaldika chuan kum 1957 atanga Lirthei khalhtute leh khualzinte tana pawl thlamuanpuiawm tak Zoram Drivers’ Union (ZDU) a lo din tawh thu leh kum 1975 atanga ZDU Serchhip Hqrs pawh din a nih thu sawiin kum 50 na (Golden Jubillee) hial an lo thleng ta chu lawmawm a tih thu a sawi a. Kawngpuia fimkhurna - Road Safety chu India sawrkarin a ngai pawimawh em em a, Ministry of Transport & Highway hnuaiah Road Safety Council din a nih thute, chumi hnuaiah District tinah Road Safety Committee din a nih thute a sawi a, kawngpuia himna inzirtir thar lehna atan kum tin Awareness programme hman a ni thin chu lawmawm a tih thu a sawi.

Record atanga alan danin kum liamtaah India ram pumah Road Accident vawi 29000 chuang a thleng a. Nunna hlu tak engemawzat chan a nih thu sawiin, Accident zaa sawmkua (90%) chu driver thiam loh a ni tlangpui thin a, ZDU ten Fimkhurna Hapta hmanga hma an la thin chu thil inhmeh tak a ni, a ti a. He hapta hman chhung hian Lirhei khalhtu (driver) te chauh nilo kawng hmangtu dang kea kal te pawhin nunna hlutzia hre thar a fimkhur thar leh theuh tur leh Two Wheeler khalhtu te pawhin Safety Helmet chu man dal ah mai ni lovin an him nana khum an nih zawk thu hre thar turin a chah.

Tun dinhmunah Zoram Driver Union (ZDU) Serchhip Hqrs hnuaiah hian member 500 chuang awm mek a. Tukina Fimkhurna Hapta hawnna hun hman a nih hnuah fimkhur tura inchahna Road Safety Week puala Car Flag an siam  chu Serchhip khawpui chhung hmun hrang hrangah an zuar chhuak nghal a ni.