2378/2025-2026

Dated Aizawl, 25th November 2025: Vawiin khan Mushroom Centre, Mizoram Science, Technology & Innovation Council (MISTIC), Directorate of Science & Technology, Planning & Programme Implementation Department, Govt. of Mizoram buatsaihin BNRGSK Hall, Aibawkah ni thum awh tur, “Capacity Building Programme on Mushroom Production & Marketing Strategies” hawnna hman a ni.

He pa khawi zirna hun hawn programme-ah hian Aizawl South III Bialtu MLA, Pi Baryl Vanneihsangi chu khuallian niin he hun hi a hmanpui a, Pu V.L. Chaka Hmar, BDO Aibawk chu khual zahawm a ni bawk. He hun hi Er. H. Lalsawmliana, Member Secretary, Mizoram Science, Technology & Innovation Council (MISTIC) in a kaihruai a, training-a tel zawng zawngte inlawmna thu a sawi a, Aibawk khaw mipui pa khawi zir tura lo kalkhawmte hnenah duhsakna a hlan a ni.

Khuallian Pi Baryl-i chuan MISTIC in science and technology hmanga kawng hrang hranga an hmalaknaah lawmthu a sawi a. Tun tuma pa khawi training-na hmun atana a Bial chhunga hmalak a ni thei te hi lawmawm a tih thu a sawi. Pa hi a hrisel mai bakah Pa khawi hi Mizo te rilrem zawng tak nia a hriat thu leh trainees ten he program atanga hlawhtlinna an chan ngei theih nan duhsakna a hlan bawk a ni.

Khual zahawm Pu V.L. Chaka Hmar, Aibawk BDO chuan Aibawk mipuite an vanneihzia leh pa khawi hi Aibawk khaw tih awm tak a nih thu a sawi a, Aibawk khua hian Pa Khawi hi larpui khawpin buaipui se a duh thu a tarlang a ni.
Dr. Lalchhandami Tochhawng, Scientific Officer leh he Training Coordinator ni bawk chuan training neih dan tur te leh training-in a tum te a sawifiah a. Tin, pa khawi duh tak takte pui turin Mushroom Centre hi a inhawng reng a, technical handholding support pe tura an inhuam thu a sawi.

Aibawk Village Council President Pu Lianhmingthanga’n an bialtu MLA in pa khawi training-na hmun atan Aibawk a thlang hi lawmawm a tih thu a tarlang a, MISTIC te nena thawk ho zel tura an inhuam thu a tarlang a ni.

Ni thum awh tur pa khawi training hi chawhnu lamah tan nghal a ni a. Trainers Pi Lalduhsaki leh Pu Lalhruaitluanga ten an kaihruai a ni.