2506/2025-2026

Dated Serchhip, the 3rd December, 2025: Serchhip DC Pu Paul L Khuma hoin vawiin khan Serchhip District-a Ruihhlo Ngaite Pual Camping neih dan tur ruahmanna siam a ni a. Serchhip DC Pisapui Hall ah Organising Committee member te an thukhawm.

Pu Paul L Khuma chuan Nasha Mukt Bharat Abhiyan (NMBA) Drug Free India Campaign hmalakna kaltlangin pawl hrang hrangte thurawn an dil thu leh, chumia rawtna lo piang pawimawh ber te zinga mi chu Ruihhlo Ngaite Pual Camping a nih thu a sawi a. Chhungkaw tam tak min nghawngtu, ruihhlo dona hmanraw pawimawh ber zinga mi a nih avangin thahnemngai taka hma la turin a sawm a; an theih anga tam tawngtainaa hlan turin a ngen bawk a ni.

Meeting ah hian agenda 6 ngaihtuah a ni a. A hun tur chungchangah kum thar February thla bawr vel tinzawn niin, Speaker atan Bethel Ministry - Frederick Lalrindika chu sawm a ni ang. A hmun atan Thankunga Camping Centre, Vengchung chu beisei a ni a. Camping hi ruihhlo ngaite pual a nih dawn avangin mipui mimir tan hawn a ni dawn lo a. Camp hi chhawng hnih buatsaih tum niin, chhawng khatna leh hnihna hi kar hnih ve ve neih ni se, tiin meeting chuan a rel a ni.

Camping buaipuitu tur hian Camping Director leh Deputy Director ruat an ni dawn a. Sub Committee peng hrang hrang 7 - Refreshment, Traffic & Security, Light & Sound, Information & Reception, Camping Follow Up, Water & Sanitation leh Medical te din ni se tiin an rel bawk a ni.

Serchhip District chhung kohhran tinte hnenah ngenna pe chhuakin, tawngtai rual thupuiah thawh thin ni se, tiin an rel a. Mahni mimal fianrial tawngtainaah a tam thei ang ber hlan turin Committee chuan Serchhip District mipuite a sawm a ni.
Vawiin meeting hi Organising Vice Chairman Upa R Sanghmingthanga’n a kaihruai a. Secretary Pu H Lalbiakkhlua’n report a pe a ni.