4818/2024-2025

Dated Serchhip, the 26^th March, 2025: Vawiin khan Urban Development & Poverty Alleviation (UD&PA) Department bultumin School Bungraw Inthleng Runpui (Swap & Safe) hawnna hun UD&PA Conference Hall ah neih a ni a. Pi Rebecca Laldinmawii Hrahsel, DUDO chuan he hun hi a hawng.

DUDO chuan zirlai bu, uniform leh zirna atana tangkai thei thil te paih mai lo a inthleng tawnna hun an buatsaih chungchang sawiin, sum leh pai tam tak khawhral tur venna tha tak a ni, a ti. Zirlai naupang leh nu leh pate pawh zirlaibu leh uniform hlui an neihte lo tiral mai lo a, inthlengtawnna atana hmun an buatsaihah te dah khawm turin a ngen  a, sawrkar atanga hmalakna a awm lohna hmunah pawh mahni remchan anga kalpui theih ni se a duh thu sawiin, kum dangah pawh chhunzawm zel tlak a nih thu a sawi. 

School Bungraw inthleng runpui hi Serchhip khawpui chhung hmun thum - UD&PA Conference Hall, New Serchhip Venglai; BNRGSK Hall, Serchhip P&E Veng leh Sub Headquarters YMA Conference Hall, Serchhip Bazarah te neih a ni dawn a. Mahni emaw kan fate tana tangkai tawhlo tur zirlaibu, uniform, pheikhawk leh zirna atana tangkai thei thil te paih mai loin heng hmunah te hian dah tur a ni ang a. A duh apiangin mamawh an neih ang ang te a thlawnin an la thei thung ang. Bungraw inthleng te  chu   fel fai taka chhinchhiah a ni dawn a. Bungraw dah tur nei leh la duhte tan he ni thum hnuah pawh hian UD&PA Conference Hall ah ngaihven theih reng a ni dawn a ni.

Programme hi Pi Lawmzuali, Manager, UD& PA Serchhip chuan kaihruaiin, Settlement Officer Pu Gaston Vanlalhriatpuia bakah Area Level Federation (ALF), VC aiawhte leh MJA te an tel a. Bungraw inthleng runpui hi ni thum  (26^th - 28^th March) chhung hman tur niin, zing dar 10:00 atanga tlai lam dar 5:00 thlengin hun hman thin a ni ang.