No.7583/2020-2021

Vawiin hian Serchhip DC Conference hall-ah Mizoram State Day, 2021 lawmna buatsaih a ni a. Serchhip Bawrhsap Pu Kumar Abhishek, IAS chu khuallian a ni.

Khuallian chuan, Mizoram chuan kan hriat theuh angina hun rei tak rambuai a tuar a, kum 1986 ah inremna lo awmin chuta chin chu vawiin thlengin state ralmuang leh hmun him ber te zinga mi a lo ni ta zawk a. State dinhmunah hlan kaia awmin hmasawnna leh inrelbawlna kawngah state dang tam takte tan pawha entawn tlak khawpin hma a lo sawn ta a ni, a ti. Pu Kumar Abhishek chuan, ziak leh chhiar thiam tam lamah te, faina leh thianghlimna lamah te leh thil tam takah state dangte tana entawn tlakin Mizoram chuan hna a thawk a, hmasawnna kawng dangah pawh kan thangduang em em a, heng zawng zawng hi remna leh muanna kan neih vang te, mipuite zingah  inunauna tha a awm tlat vangte a ni, a ti a. Zirna lamah te, skill development lamah te, Tourism lamah te leh kawng dang tam takah hmasawn theihna thil tam tak kan la nei a ni, a ti bawk. Khuallian chuan, he huna tel tur sawm Head of Offices te, chanchinbumite leh tlawmngaipawl aiawhte chu midangte entawn tlaka nunga, a tha zawnga thil thlak thlengtu nih tum tlat tura chahin, remna leh muanna te, inunauna thate a awm zel theihna atana palai ni tlat tur tein a chah a ni.

He hunah hian Dr. Zarzosanga Asst. Professor, Political Science, Govt. Serchhip College chuan thusawina hun neiin Mizoramin ram rorelna lama ke a chheh tawh dan tlangpui leh kan hmabak awm thei nia a hriatte a tarlang a ni.

He inkhawm hi Pu Lalmuansanga Ralte, MCS, Addl. DC chuan a kaihruaia, Pastor K. Lallawmkima’n hunserh hmangin; Sub Headquarters YMA zaipawl leh Pi Laithangpuii ten kalkhawm te zaiin an awi a, Pi C. Lalduhzuali, MCS, SDO Sadaar in lawmthusawiin inkhawm a khar a ni.

Mizoram State Day, 2021 lawmnaah hian Pu Kulothungan, IAS, SDO, Thenzawl leh Serchipa Head of Offices awm zawng zawng te, tlawmngaipawl aiawhte leh chanchinbumite an tel a ni.