Health & Family Welfare Minister Dr. R. Lalthangliana chuan tukin dar 8:30 khan Kanhmuna COVID-19 Screening Point a tlawh a, hetah hian Screening Point a duty te leh Kanhmun Local Task Force hotuten an lo dawngsawng a ni. Health Minister chuan Kanhmun Screening Point ah hian chawhrualin nitin mi 80 - 100 inkar an screen reng thin a, COVID-19 laka Mizoram him nan helai hmun hi a pawimawh em avangin

emergency in a rem dan ang anga screening point hi hnawhsarum taka buatsaih a ni a phuah a ni a. COVID-19 hripui hian engtikah nge min kiansan dawn a hriat rih si lova, engemawchen chu screening point la dah a ngaih hmel avangin changtlung deuh zawka siam a tul a ni, a ti a. Thawktute nen sawihovin an mamawh an thlen te chu a rang thei ang bera bawhzui nghal a nih tur thu Minister hian a sawi a ni.

Minister hian Zawlnuam Primary Health Centre leh Kawrthah Community Health Centre pawh tlawhin an dinhmunte leh an mamawhte a zirchiang nghal bawk a, hmalak theih nghal chi te chu a tul ang anga bawhzui a nih tur thu a sawi a ni.

Health Minister Dr. R. Lalthangliana hian nimin atanga tanin vawiin zing thleng kha  Zampui tlangdunga Zofate chenna khaw hrang hrang 11 - Zomuantlang, Phuldungsei, Sabual, Tlangsang, Banglazion, Behliangchhip, Vanghmun, Tlaksih, Hmunpui, Hmawngchuan leh Vaisam a tlawhchhuak vek a, heng khaw hrang hrangah hian khawtlang hruaitute nen inkawmin Minister chuan Zampui Tlangdunga zofate chu kan unaute in nih avangin Mizoram sawrkar hian a enhrang dawn lo che u a, a thlahthlam dawn lo che u a ni, a ti a. Khawvel ramri khamin min thenhrang mahse kan thinlunga kan inunauna leh kan inlaichinna hi emgmahin a tichhhe thiang lova, kan tu leh fa, chhuan lo la kal tur zelte thlengin kan sawhngheh sauh sauh a tul a ni, tih sawiin, Mizo hnam a dinchhuah a a than duah hluah hluahna tur chuan khawvel hmun hrang hranga zofate hi kan tanrual reng a ngai a ni, a ti.