No.2572/2021-2022
Dated Aizawl, the 12th October, 2021: Vawiin khan AH & Vety Training Hall Serchhipah FOCUS hnuaia vawk vulh tura thlan bik mi 10 hnenah Vawk chaw channa khawl hlanna hun leh vawk chaw sawngbawl dan inzirtirna hun hman a ni.

Dr. Lalrotluanga Sailo, Deputy Director (Vety), PMU, FOCUS chuan thu sawiin, ran vulh tura thlan chhuah (Progressive farmer) te hnena vawk chaw channa (Chaff Cutter) pek an ni chu a lawmpui thu a sawi a. Anni ho hi sawrkarin duhsak takin vawkin sakna tur a pek bakah vawkpui tur a note 6 theuh pek an la nih tur thu a sawi a ni. ASF avangin vawk an thi nasa em em a, mahse chu chu hnual phah nana hmang lovin chona thar anga ngai zawka beidawng lova nasa zawka hma la zel turin a chah a. Ran vulhtute chu sawrkarin a theih chin chinah puih zel a tum thu sawiin, Ran chaw upna tur hmanruate pawh pek an la nih tur thu a sawi a ni. Tuna an pek a chaw channa khawl pawh hi khawl chak tak 3 horse power lai a ni a, hnim kuang lian tak pawh a thuai bung thei a ni. Department atanga farmers te tanpuina pek tawh hman tangkai loha awm thin erawh pawi a tih thu sawiin vawiina mite hi chuan tangkai taka hmang ngei tura chahin, an hmang tangkai ngei em tih pawh thawktuten an enfiah zui tur thu a sawi bawk.

Pu K. Laltlanmawia, District Project Manager, FOCUS Serchhip pawhin thusawiin, sawrkarin ran chaw siamna atan cheng nuai 10 a ruahman sak hmangin FOCUS Serchhip chuan vawk chaw leh ar chaw an siam tur thu a sawi a, vawk chaw siamsa phai atanga lakluh pe tawh lovin FOCUS in an siam ngei chaw tharlam tak pek theih turin nasa taka hma an lak mek thu a sawi a. FOCUS hnuaiah vek hian khaw 20 a chhungkaw 550 te chu vaimim chin tir niin, tin 800 hmun chuang ah an ching meka, 3500 qtl thar an beisei thu a sawi. Chung vaimim te chu leikhawm sak leh mek an ni a, Vaimim nena pawlh turin Bekang pawh a chi qtl 21 leiin khaw 30 ah an chin tir a, eng emaw zat thar an beisei a thu a sawi bawk. Vaimim hi kg 1 ah Rs. 20 leh bekang kg 1 Rs.100 zelin loneitute hnen atangin an lei let leh vek ang a. Chung chu ran chaw herna khawlin an her ang a, vawk leh ar vulhtuten man tlawm zawka an lei turin an chhawpchhuak leh dawn a ni.

He hun hi Dr. R. Lalmakthanga, DVO, Serchhip chuan a kaihruai a, FOCUS hmalakna hnuaia vawk vulh tura thlan chhuan mi 10 te chu vawk note kan intodelh leh theih nana theihtawpa hma la tura beisei an nih thu a sawi a ni a. A chaw channa khawl tha tak an dawng chu a lawmpui hle tih a tarlang a ni.

Dr. Thangzadinga, CVO, Serchhip chuan lawmthu sawiin hun a khar a. Chumi hnuah department thawktuten khawl hman leh enkawl dan turte a taka ti chung zelin an zirtir a ni.