No.2571/2021-2022
Aizawl, 12th October 2021 : Vawiin khan Dawrpui Multipurpose Centre-ah Aizawl East-II bialtu MLA leh Sports Minister ni bawk Pu Robert Romawia Royte chuan a bial mi kum 2021-a HSLC leh HSSLC exam-naa hlawhtlingte hnenah lawmpuina thilpek a sem a. Hemi rual hian fa nei tamte hnenah chawimawina tangkafai leh thuziak hlan a ni bawk.

Pu Robert Romawia Royte chuan zirlaite, nakin lawka ram leh khawtlang hruaitu la ni turte fuih phur nan leh zirna kawnga intlansiakna kawng dik an zawh theih nana insenso chu thil zawngchhang tlak nia a ngaih thu a sawi a. Hemi rual hian thalai fa la nei zel turte pawhin fa neih tam hreh lo tur leh zirna uar zel a pawimawhzia inzirtir thar tul a tih thu a sawi bawk a ni.

Pu Vanlalruata, Central YMA President pawhin thu sawiin, sorkar dinhmun pawimawh chelh tura tuna zirlaiten tan lak tul a tih thute, Central YMA-in a ngaih pawimawh zirna uar thu leh ram leilung luah khat tura fa hrin tam inzirna a kalpui mek ngai pawimawh a, Aizawl East-II bialtu leh Minister Pu Robert Romawian hma a la chu lawmawm a tih thu a sawi a. Aizawl East-II Veng pasariha Pass lawmpuina dawngtu aiawha thusawitu Pu Joseph Vanlalhruaia, Tuithiang Branch YMA President pawhin bialtu MLA leh Minister Pu Robert Romawia Royte-in bial chhunga thalaite hmasawnna tur lam hawia a hmalaknate leh bial mipuite tana a hnathawh hrang hrang tar langin, Aizawl East-II mipuite chuan an theihnghilh tawh loh tur thu a sawi a ni.

Pu Robert Romawia hian Aizawl East-II chhunga Veng pasarih - Dawrpui, Saron Veng, Chhinga Veng, Tuithiang Veng, Armed Veng South, Armed Veng leh Chite Veng atanga Pawl 10 leh Pawl 12 pass te hnenah hian kum 2019 atang khan kum tin lawmpuina thilpek a lo pe tawh thin a. Kumina Mizoram puma top ten-a pass mi pathum - HSLC-a 10-na Lalnunmawii d/o Zahena, Tuithiang Veng, HSSLC Science stream-a 6-na Demetri Vanlalrelkima s/o Lalrikhuma, Chhinga Veng leh David R.Lalhumhima s/o Lalengzami, Armed Veng, Commerce stream-a 8-na hnenah lawmpuina Laptop a pe a, mi dang Distinction-a pass 160 te hnenah lawmpuina SL&PB siam Mizo English Dictionary chu a MLA Fund atangin a hlan a, Pawl 10 leh 12 pass dangte hnenah pawh lawmpuina pek leh tum a ni a. Minister chuan
nula chhuanawm Mawimawii, Armed Veng, pian phunga harsatna nei chunga wheel chair atanga hlawhtling taka Law Graduate (LL. B) tha taka pass lawmpui nan Laptop a hlan bawk a ni. Covid-19 hrileng avangin zirlai tithate kohkhawm vek an remchan loh avangin Branch YMA pasarihte hnenah lawmpuina thilpek hi hlan niin, annin an remchan angin an Branch member-te hnenah an hlan chhawng dawn a ni.

Kohhran leh Central YMA ten Zo fate zingah fa nei tam tura inzirtirna kalpui mek tihhlawhtlin nan leh awareness neih nan Aizawl East-II bial chhunga fa nei tamte zawng chhuakin fa nei tam mi 17 te hnenah Chawimawina Tangkafai Rs. 2,50,000/- leh Thuziak hlan a ni a. Pi Ngurauvi w/o Ngunthanga (L), Tuithiang Veng, fapa 7 leh fanu 8, a vaiin fa 15 hringtu hnenah lawmman pakhatna tangkafai Rs. 1,00,000/- leh thuziak hlan a ni a, Lawmman pahnihna dawngtu fa 13 hringtu Pi Lianthangi, Chhinga Veng hnenah tangkafai Rs. 30,000/- leh thuziak hlan niin, Pu Kapliana, Chhinga Veng leh Pi Sangthuami, Chhinga Veng leh Haitinhnemi, Armed Veng te chuan fa 12 theuh neiin lawmman pathumna tangkafai Rs. 20,000/- theuh leh thuziak an dawng bawk a ni. Mi dang fa pariat nei chin mi 12 te hnenah Consolation prize Rs. 5,000/- theuh leh thuziak hlan a ni bawk.

He hunah hian Minister Pu Robert Romawia Royte din NECS chuan Central YMA ten a tul anga an hman atan cheng nuai sawm panga (Rs. 15,00,000/-) an ruahman chu Tv Vanlalfelpuia Royte, Chairman, NECS-in a hlan bawk.

Vawiina zirlai pass te leh fa nei tamte lawmpuina hun hi Rev. P.B.Mankima’n kaihruaiin, Central YMA hruaitute bakah, Aizawl East-II bial chhunga Veng pasarih atangin Local Council member, YMA, MHIP leh MUP aiawhte bakah zirlai titha zualte leh sawm bikte an tel a ni.