404/2025-2026

Dated Serchhip, the 30^th April, 2025: Vawiin khan Serchhipah District Legal Services Authority hmalakna in 'The Mizoram Victims of Crime Compensation Scheme' hnuaiah Serchhip District chhunga pawi khawihna tuartu mi pathum te hnenah zangnadawmna Rs. 3,50,000/- pek an ni.

Zangnadawmna dawngtu mi pathum zinga pahnih hi kum tlinglo khuai khem tawkte an ni a, pakhat hi midang kut tuar avanga nunna chan a ni. Kum tling lo khuaikhem tawk pahnih te hnenah Rs. 75,000/- ve ve pek niin, ram vahnaa mi kut tuara boral chhungte hnenah Rs. 2,00,000/-hlan a ni.

Pi Josangzeli Tlau, Secretary, District Legal Services Authority, Serchhip kaihruai zangnadawmna hlanna-ah hian Sub-Headquarters MHIP President Pi Lianthangi chuan thusawiin dan bawhchhetute avangin Serchhip District-ah chhawmdawl ngai an awm leh thin chu pawi a tih thu a sawi a, chhawmdawlna dawngtute chu fuih in "Kan tih sual ni lovah tuartu ni mah ila, in dawm kun reng tur kan ni lova, dinhmun chhe ber atangin sang takah a awm leh theih a ni." a ti a, chhawmdawlna sum te chu tangkai pui ngei turin a fuih bawk a ni.