4023/2024-2025 

Dated Serchhip the 30^th January, 2025: Vawiin khan Serchhip DEO Pu Paul L Khuma, Serchhip DC ni bawk leh Serchhip bialtu Election Observer Pi C Lalduhzuali hoin Village Council Inthlanpui lo awm tur atana inbuatsaihna thlirho a ni. 

Meeting ah hian DEO Pu Paul L Khuma chuan Election hi theihtawp chhuaha mi zawng zawng tanrualna nena hmachhawn a tulzia a sawi a. Nodal Officer te leh Sector Magistrate te ruahmanna chipchiar taka duang a, tha taka keng tlang turin a fuih. Inthlanna muanawm leh felfai taka kalpui chu an tum ber a nih thu sawiin DEO chuan meeting-a tel te chu a ki peng pawimawh ber ber te an ni, a ti a. An chanpual theuh hnehsawh taka kengkawh turin a chah a ni.  

Observer Pi C Lalduhzuali chuan Serchhip District-ah Election felfai leh thianghlim takin neih a lo ni tawh thin a, tun tumah pawh tluang taka a kal a beisei thu a sawi a. Tun hnai lawkah MLA leh MP inthlanpui hlawhtling taka neih zawh a ni tawh a, a kalphung a inang tlangpui a, thil danglam deuh awm te hre chiang tu leh buaina awm theite chingfel tura inbuatsaih turin thawktute a fuih a. Mahni mawhphurhna theuh bel taka hre theuh turin a chah a ni. 

Vawiin meeting-ah hian Nodal Officer ten an chanpual theuha ruahmanna an siam te an tarlang a. Fel hlel lai leh hmaih palh awm te sawiho leh siamthat a ni a. Sector Officer te hi Magisterial Power pek vek niin an bial theuhah Sector Magistrate mawhphurhna an kengkawh nghal dawn a. Polling Station tinah Assured Minimum Facility a awm kim em tih endikin an fehchhuak bawk a ni. 

Tun tum election ah hian 90% voter turn out neih ngei tumin Serchhip District chuan tan a la a. MPF te, YMA te, MJA te leh SHG te nen thawk hoin thuang hrang hranga hmalak a ni dawn a. Polling Booth tinah Mizo thuama inthuam Booth Ambassador siamin vote thlak tura mipui lokal te an tanpui a nga. Voter tam dan a zirin category 3 a thliarin Voter turn out inelna siam a ni dawn a, vote tlak thatna ber Sector Officer, VLO leh YMA te lawmman pek an ni ang.