2294/2023-2024

Dated Serchhip, the 13^th October, 2023: Vawiin khan SVEEP, Serchhip District Election Office chuan Serchhip Government College Electoral Literacy Club te nena tangkawpin Voters’ Awareness Rally neih a ni a. He hunah hian Pu Gaston Vanlalhriatpuia, Asst. Returning Officer, Tuikum Constituency chu khuallian a ni.

Rally hi Tuikhuah Veng peng atanga tanin Serchhip Bazar lunlai ah neih a ni a. Rally flag off tu Pu Gaston Vanlalhriatpuia chuan Government Serchhip College leh District Election Branch ten SVEEP kaltlanga Voters’ Awarenesss Rally hlawhtling taka an buatsaih avangin lawmthu a sawi a. MLA Election hmasa zawkah khan Serchhip District ah vote za zelah 85 vel a tla a, rampum huap thlir pawhin a tha thawkhat hle a, chutihrual erawh chuan tha thlah loa kan tan a ngai, a ti a. “Inthlanpui hmasa zawk aia tam kha kuminah hian tlin kan tum a, za-ah 90 tal kan tlin theih nan vote nei zawng zawngten vote thlak theuh tum ila, kan thiante leh kan chhungte pawh lo hrilh thar leh theuh ang u”, tiin rally a tel te a sawm a ni.

Rally kharna inkhawm tawi buatsaihah Serchhip Govt. College Principal Pu C Laldintluanga chuan thusawiin Voters’ Awarenesss Rally buatsaih a nih chhan leh thil tum te a sawifiah a. Thalai rual pungkhawm te chu vote thlak pawimawhzia hriaa General Election lo awm turah vote thlak theuh turin a sawm a. Khua leh tui dik tak te chanvo vote thlak hi a hlut zia hre thar a, a tam thei ang berin vote kan thlak theih nan tan la turin a sawm a ni.

Voters’ Awareness Rally hi Young Voters Festival programme hnuaia hmalakna hmasa ber a ni a. Young Voters’ Festival hi Serchhip Govt. College ah ni thum chhung buatsaih a ni dawn a. Ruahman dan chuan October ni 18 (Nilaini) hian a hawnna programme chu Serchhip DC hova neih tur a ni. He programme ah hian vote thlak uar tura inzirtirna kawng hrang hranga kalpui a ni ang a, vote nei thar ten phur taka vote an thlak theihna turin programme hlimawm tak buatsaih tum a ni.