4518/2024-2025

Dated Serchhip, the 4^th March, 2025: Tukin zing dar 7 khan Mizoram Health Systems Strengthening Project (MHSSP) hma lakna hnuaiah Serchhip khawpuiah hriselna atana kea kal runpui, "Walk for Health Walkathon 2025" neih a ni.

Walk for Health Walkathon-ah hian mi 700 chuang an tel a. School naupang, YMA, MHIP, MJA, Government Serchhip College leh DIET zirlai te bakah Health Department leh Serchhip khawpui chhunga sawrkar department hrang hranga thawktute an tel a. Pu Philip Kumar, World Bank Consultant pawh Serchhip khawpuia walkathon buatsaihah hian a lo tel a ni.

Kawng zawhtute hi hmun hniah inthenin team khatna hi Serchhip Bazar Traffic Point atangin an kal tan a. Team 2-na hian New Serchhip College peng atangin bul an tan thung a. Leisekawt Field ah intawkkhawmin inkhawm tawi buatsaih a ni a, Serchhip DC Pu Paul L.Khuma chuan kharna inkhawmah hian thu sawiin hriselna atana kea kal pawimawh zia a sawi a. Natna chi hrang hrang - cancer, bp sang, stroke, heart attack, diabetes tih te leh natna dang tam tak hi taksa insawizawi avangin a pumpelh theih a ni, a ti. Walkathon a tel te fuihin taksa leh rilru hrisel kan lo neih theih nan taksa insawizawi, ei leh ina fimkhur leh mahni inthun theih pawimawhzia hria a, a taka nunpui tu ni tur leh, mi dang te zirtir chhawngtu ni theuh tum turin a chah a ni.

He hunah hian Sr. CMO Dr LP Malsawma chuan Walk for Health Walkathon 2025 neih a nih chhan sawiin hriselna atana kea kal tam hi nunphunga neih tum turin kal khawmte a chah a ni.

Vawiin programme-ah hian Badminton National Under-17 Double ranking a No.1 hauh mektu Malsawmhlua chuan fuihna thu a sawi a. Zaithiam zai te ngaihthlak niin Dr. Beth VL Nuntluangi, DHQM, Serchhip chuan lawmthu sawina hun a hmang a ni.