1446/2022-2023

Dated Serchhip, the 3rd August, 2022: Vawiin khan Serchhip DC Meeting Hall ah World Day Against Human Trafficking denchhenin National Commission for Protection of Child Rights (NCPCR), State Commission for Protection of Child Rights (SCPCR) leh District Administration tangkawp te chuan mihring hmanga sumdawnna (human trafficking) chungchang inhrilhhriatna an buatsaih a, “Child Trafficking pumpelh dan” zir hona an nei.

He hun kaihruaitu Pi Nazuk Kumar, IAS, Serchhip bawrhsap chuan, kan district chhungah human trafficking case awm rih lo mah se engtiklai pawha lo thlenga lo awm ve thut thei anih avangin kan inbuatsaih lawk a ngai a. A invenna leh a lo thlen palha a umzui hnaah mawhphurtu tam tak kan awm avangin a mawhphurtu department thawktuten inpuahchahna tha tak kan neih lawk a tul a ni, a ti. Mizoram chu mipuite inpawhna leh inlaichinna a that vangte, kohhran leh tlawmngaipawlte inpekna avang tein India ram hmun dangte nena huang khata dah theih a ni lova, Child Labour ah te, Bonded Labour leh Prostitution lamah te case kan nei mang lova, amaherawh chu ramria awm kan nih avangin International human trafficking lamah kan mit kan len nasat deuh deuh erawh a tul a ni, a ti a.  Human Trafficking lam zirtir tura Delhi atanga lokal National Commission mithiamte chungah lawmthu a sawi a ni.

Pu Stephen Lalrinawma, SP pawhin thusawiin, Mizoramah kum 2000 atangin Human Trafficking Case kan nei tana, case kan ngah ber kumah case pasarih (7) ziahluh a ni. Kum 2000 atanga kumin thlenga kan case ziahluh tawh zat hi 35 a ni a, trafficking tuartu hi an vaiin 95,  puitling 62 leh naupang 33 chhanchhuah tawh niin, a mawhphurtua puh Mizo 47 leh hnamdang 17 thubuai siam sak an ni tawh tiin Mizoram dinhmun tlangpui a sawi a. Foreign a hna zawngte leh India ram khawpui lian zawka hna zawngte chungah hetiang hi a thleng nasa bik nia tarlangin, an hnathawhna ram azira han umzui mai harsa deuh te pawh a awm a, an va awmna hmuna Mizo Welfare ten nasa takin hetiang tuartute chhanchhuahna kawngah Police te an tanpui thin thu a tarlang bawk a ni.

Dr. Julie Remsangpuii, State Commission for Protection of Child Rights member pawhin an Commission hnathawh dan tlangpui sawina a nei a ni.

Vawiina kalkhawmte hmaah hian National Commission for Protection of Child Rights atanga lokal mithiam bik  Anshu Sharma chuan “Naupang hmanga sumdawnna laka inven dan” (Preventing Child Trafficking) tih thupui hmangin zirtirna a pe a, chumi hnuah kalkhawm ten sawi hona hun an hmang zui a ni.

Vawiina Human Trafficking zir honaah hian Serchhip a hetiang case lam buaipuitu Police te, District Child Protection Unit a thawktute, naupang enkawlna Homes hrang hranga thawktute, Juvenile Justice Board aiawhte leh official pawimawh dangte an tel a ni.