Vawiin chhun dar 12:00 khan Serchhip Hmar Veng YMA Hall-ah Shalom Spastic Society, Serchhip leh SSA Mission, Serchhip District-te huaihawtin World Disable Day 2012 hman a ni a, Pi B. Sairengpuii, Commissioner, Persons With Disability (PWD), Mizoram chu khuallian niin Shalom Special School, Serchhip Principal Col. Ratnakar Trivedi, Comandant, 14 Assam Riffle chu Khual Zahawm a ni.

Khuallian chuan thu sawiin Serchhipah changtlung leh phuisui taka World Disable Day hman a ni leh chumi atana khualliana sawm a ni chu lawmawm a tih thu a sawi a. Tin, tuna a dinhmun chelh mek chungchangah boruak nuam leh hahdamthlak tak a la awm thei rih chiah lo chu pawi a tih thu sawi langin hei hi a ni chuan chona leh fuihna tangkai tak atana a hman tur thu a sawi a, rualbanlote hamthat nan theihpatawp a chhuah zel tur thu leh heng rualbanlote enkawltu, department leh tlawmngai pawl tute tan pawha a inhawn reng thu sawiin inthlahrung lova an mamawhte sawi hreh hauh lo turin a chah a, tha leh tling taka he hna hi a thawh theih nan rawtna leh fuihnate hmanga amah finchhuah thin turin kalkhawmte leh hetiang lama thawktute a ngen bawk a ni.

Khuallian chuan Central Sorkarin a nawr anga Mizoram-ah full time Commissioner (PWD) siam a lo ni ve ta chu lawmawm a tih thu sawiin tun dinhmuna Mizorama rualbanlo kan neih chu 2001 chhiarpui behchhan a la nih rih thu leh chumi ang chuan 1.8% a nih thu sawiin 2011 chhiarpui siamfel mekah hei aia data rintlak lehzual zawk neih theih a bawiseiawm thu a sawi bawk. Pi Sairengpuii chuan February 2, 1996 khan PWD Act hi Mizoramah hman ve tan a nih thu te, he dan hnuaiah hian pianphunga rualbanlote tan hamthatna chi hrang hrang a awm thu te, he dan hi a taka hmang tangkai tur chuan tih tur tam tak a la awm thute leh chumi thawk tur chuan theihtawp an chhuah zel tur thu a sawi a, Serchhip-ah Shalom Special School enkawlna kawnga Board hmalakna te, Assam Riffle te inpekna leh department hrang hrang te thawhhonaah lawmthu a sawi bawk a ni.

He inkhawm hi Pu H. Vanlalhruaia, Chairman, Shalom Spastic Society, Serchhip chuan a kaihruai a, Khual zahawm leh Shalom Special School Principal ni bawk Col. Ratnakar Trivedi, Comandant, 14 Assam Riffle thuchah ngaihthlak a ni a, Pu Lalthanzira DPC, SSA Mission Serchhip District pawhin thu sawiin naupang ten an thiam thil hmuhnawm, hlimawm leh rilru khawih tak takte an entir bawk a ni.