Vawiin khan Home Minister Pu R.Lalzirliana hoin a Office Chamber ah kumin 2012 Krismas leh kumthar vuak vet a Halpuah, Halzit, Silailem etc.. khap chung chang ngaihtuahin a kaihhnawih Department hrang hrang leh Central YMA hruaitute an thukhawm.

Home Minister Pu R.Lalzirliana chuan thuhma sawiin kumhnih kalta atang khan Krismas leh kumthar vuak veta, tul lova sum insenna leh boruak chhia awmtir tu Halpuah leh a kaihhnawihte, Silai lem mihring intihpalh theihna te sorkar leh mipui tangrualin kan khap a. Damlo leh lung lam thalo te pawhin hahdam takin an hman theih phah a. Mipui pawh an lawm hlein a hriat a; chuvangin kuminah pawh hian khauh taka kenkawh leh tum a ni a ti a.

Tichuan, hmalak dan tur hrang hrang an sawiho a, kumdang ang bawkin Enforcement lam hote hma la turin an ruahman a. Mizoram kawtchhuah hrang hrangah te phei chuan khauh zawka hmalak nise an ti a. Dawrkaite pawhin heng khap thil ang hi lo zuar lo turin an ngen a ni.

Kumdang a tih thin danin kumhlui thlah zana thalaite intihhlim nan Aizawl khawpui chhungah hmun 6-Kulikawn, College veng; Zemabawk; Dinthar; Luangmual leh Arm vengah te hman a ni ang a. Lungleiah hmun 2, leh District Hqrs hrang hrangah hmun 1 theuhah hman a ni bawk ang. Heng atan hian sorkarin sum pawh engemawzat a ruahman sak a ni.