4970/2025-2026

Dated Serchhip, the 24th March, 2026: Vawiin DC Pu Paul L Khuma hovin Serchhip DC Pisapui Hall-ah World TB Day hman a ni a. Kumin thupui hi “Yes! We Can End TB! Led by Bharat, Powered by Janbhagidari” tih a ni.

DC Pu Paul L Khuma chuan TB do hneh tura sawrkar hmalaknaah mipuite kan pawimawhzia a sawi a. TB vei lo tura invenna kawng hrang hrang kan hriat te hi a taka kan nunchhuahpui a tul a, kan lo vei a nih pawhin doctor ten tih tur leh tih loh tur min hrilh kan zawm tur a ni, a ti. Village Council tin te TB Free Village a puan theih tura tang turin DC chuan a fuih a. TB dona beihpuithlak tur hian sawrkar mi leh sa te chauh tih theih a ni lo a, kawng tinrengah VC te an pawimawh a; inchawm tawn a, thawkho tur kan ni, Pu Paul L Khuma chuan a ti a. Kuminah chuan Serchhip District chhunga VC zawng zawngte TB Free Village kan nih theih nan hma i la ang u, tiin kalkhawmte a sawm a ni.

TB Mukt Bharat Abhiyan thawhhnihna chu vawiin hian hawn nghal a ni a. He hmalakna hnuaiah hian Serchhip District chhung khaw tina mi cheng za zelah sawmhnih tal TB an vei leh vei loh endik a ni dawn a. Thuang hniha kalpui tur niin Health Department staff ten an hmanrua nen khaw tin an pan chilh a nga, TB damlo hmuhchhuah tumin thapui an thawh dawn a. A pahnihnaah chuan District Hospital, PHC, CHC, Health & Wellness Centre, sawrkar damdawi in leh clinic zawng zawngah TB damlo zawnchhuah hna thawh a ni anga. Jail, orphanage, HIV hrik pai, natna benvawn vei, zu in leh mei zial zu thin te chu a tam thei ang ber an endik (screen) dawn a ni.

Serchhip District ah hian kuminah TB Free Village a puan 23 an awm a. Gold dawngtu - Hmuntha; Silver dawngtu - Bungtlang, Serchhip Field Veng, Khumtung, Lungpho, Ngentiang, Leng leh Sailulak; Bronze dawngtu - Chhiahtlang North, Buangpui, Chhingchhip Mualpui, Hualtu, Kanghmun South, Khawbel, Lungchhuan, Neihloh, Rullam, Sialhau, Thentlang, Thinglian, Zote South leh Piler te an ni. Gold dawngtu hi kum 3 a zawna TB Free Village a puan ten an dawng a; silver hi kum 2 niin bronze hi kum 1-na ten an dawng a ni.

Vawiin hian TB vei te thian - TB Nikshay Mitra - TB veiten ei leh in hrisel leh chakna tam an dawn theihna tura thla tin cheng 700 a pui thintute hnenah lawmman hlan a ni bawk.

Vawiin Programme hi Senior Chief Medical Officer Dr LP Malsawma’n a kaihruai a. Dr  Lallawmkimi Chhakchhuak, District TB Officer chuan report a pe a. District Medical Superintendent Dr ZD Lalmuanawma’n lawmthu sawiin hun a khar a ni.