No.6067/2020-2021

Dated Serchhip, the 14th October, 2020: Vawiin hian Serchhip DC Meeting Hall ah zirna in hawn chungchang inrawnkhawmna Pu Kumar Abhishek, IAS, DC kaihhruainaa neih a ni a. District Task Force on Covid19 member te leh sawm bik mi pawimawh te an tel a ni.

Vawiina meetingah hian zirtirtu pawl aiawh hrang hrangte chuan zirlai naupangte dinhmun ngaihtuah chung leh kan district chhunga covid19 dinhmun thlir chungin zirna inte chu a kalpui leh tan theih tawha an ngaih thu an sawi hlawm a. Amaherawh chu naupang kum 10 hnuai lam chin te erawh chu la kalpui loh an duh tlang thung.

Heng pawl aiawh hrang hrangte ngaihdan thlir chung hian Meeting chuan state thuneitu sang zawka thlen turin hetiang hian rawtna an nei a ni. Serchhip district ah tun thlengin Covid19 hri hi mipui vangtlangah a la leng lova, mipui nawlpui hi chu kan la him nia hriat a ni. Hei vang hian Class 6 leh a chunglam te hi chu tum khatah zirlai 30 aia tam lo zela kal chunga class neih tan a theih tawhah ngaih a ni a. Zirlai naupang an ngah dan a zirin school hrang hrangte chuan an naupangte  inkalchhawk tir dan an ngaihtuah ve thung ang. Tin, sawrkarin SOP a siam te chu an zawm that ni se, Medical lama thawktuten school tina zirtirtute chu Covid19 laka himna dan a tharin zirtir nawn se, naupang nu leh paten an fate chu khawsik emaw covid19 symptom nei chungin school an rawn kal tir lo a ni tih intiamna nei bawk se, class tin tan dawn leh neih zawh hlimah kutsil vek ni se tih te, school ten thermal scanner nei thei se tihte pawh rawtnaah hian a tel a ni.

Heng rawtna te hi State Level a thehluh leh chauh tur a ni a, thuneitu sang zawk atangin thutlukna tak tak chu a la rawn awm chauh dawn a ni.

Vawiin meetingah hian Pu R. Sathiyasundaram, IPS, SP, Pu Lalmuansanga Ralte, MCS, Addl. DC, Pu Vishal Sah, IAS leh District Task Force Members te bakah Pu Vanlalchhana, SDEO, Primary School Teacher Association, Middle School Teachers Association, Serchhip Teacher Association,  Govt. Serchhip College, JNV Thenzawl, Eklavya Residential School leh  Serchhip Jt. VC aiawhte an tel a ni.