Vawiin chawhnu khan District Level Monitoring Squad on Illegal Quarrying, Serchhip District, chu an chairman leh DC ni bawk Pu Lalsangliana hovin an thukhawm. He thutkhawmah hian Serchhip District huam chhung motor kawngpui kama lung lakna him leh him lo chungchang te leh phalna nei lova lung lak chungchang te sawi a ni a. Hun remchang hmasa berah quarry-te hi enfiah nise an ti a ni.

Report atanga a lan danin Serchhip District-ah hian permit neia quarry kalpui mek mi 20 an awm a, hengte hian mipui himna ngai pawimawh theuh se, thuneitute thu zawm lo an awm chuan an chungah khauh taka hmalak nise, phalna nei lova lung lakna te pawh ti tawp nghal tura hma lak ni se an ti bawk.

Kawng kama phalna nei lova lung la te, ti tawh lo tura hriattir an nih thin dan leh hengte hian hun rei lote hnuah an lak luih leh mai thin dan te sawi ho a ni a, vanduaina a thlen hma ngeia hmalak a ngaih thu leh fimkhur a tul thu te DC chuan a sawi a ni. He thutkhawmah hian District Bawrhsap bakah Pu Robert C. Lalhmangaiha SDC, Pu Lalrinawma Addl. SP, Pu Lalchungnunga EE PWD Serchhip Division te, Geology & Mineral Resources Deptt aiawh te leh Town chhunga VCP te an tel a ni.