Vawiin hian Khawlailung Dinthar YMA Hall ah Sericulture Department bul tumin Farmers Training buatsaih ani a, Pi Vanlalawmpuii Chawngthu, Minister of State, Sericulture Department leh bialtu MLA ni bawk chuan khuallian niin a hmanpui a. CM Special NLUP Assistance chhungkaw 18 hnenah a sem nghal bawk.

He training hawnna inkhawm tawi, Pu V. Zothansanga, Serchhip District Sericulture Officer kaihhruaia neih ah hian Pi Vanlalawmpuii Chawngthu chuan, a bial chhung khua Khawlailung chu SAGY village hmasa ber atana thlan a nih bakah sawrkar atanga duhsakna tam tak a dawng zuia, a lawmawm tak zet ani, a ti a. Duhsakna kan dawn chhan hriaa, kan lawmthu sawina tur chu a taka thawhchhuah hi ani tih kan hriat a pawimawh hle ani, tiin loneitu kal khawmte a ngen a. Silk phei chu a hralhna tur buaina awm lo, a rate tlahniam ngai lo ani a. Daihlim hnuaia hnathawh a ni deuh ber bawk a, Mizoram hi a that duhna ram ani an ti lehzel bawk si a, kan tan he eizawnna hi a thain a phurawm ani, tiin kalkhawm te a fuih a ni. Mizoram sawrkarin mipuite hnenah tanpuina kawng hrang hrangin a pe thin a, a tih turte a hlen thin a ni. A dawngtute lamin tanpuina kan dawn chhan ang ngeia kan lo hmana, kan lo hlawhtlinpui  theuh chuan he ram hi a lo dingchhuakin hmasawnna nasa zawk kan lo hmu dawn tihna ani a, kan ramin hma a sawn zel theih nan kan zavai hian mahni zawn theuhvah mawhphurhna kan nei theuh ani, a ti bawk. Vawiina an puala training an buatsaih hlutzia hriaa taima taka training theuh turin pangangvulhtu kal khawm te hi a chah bawk ani.

Khuallian hian Khawlailunga Pangang vulhtu tha mi pathum thlan chhuah hnenah Central Silk Board lamin an rawn tum sak lawmman hlanna a nei nghal a. Lawmman dawngtute hi pakhatna Pu Roliana, pahnihna Pi Lalremtluangi leh pathumna Pu Lianmama te an ni a. Integrated Sericulture Development Programme atanga lei Solar Lamp chu pangang vulhtu chhungkaw pathum hnenah a hlan bawk ani.

He hunah hian CM Special NLUP Assistance semna pawh neih nghal ani a. He CM Special NLUP Assistance hi tlem lai deuhva tihfel tawh, engemaw avanga la sem chhuah rih loh ani. A buaipui turin Pu Pachhunga, SDO (civil) N. Vanlaiphai chu he hunah hian a rawn tel a, a dawngtu tura thlante hnenah khuallian Pi. Vanlalawmpuii Chawngthu hian a hlan a ni. Khawlailung a sem chhuah he tanpuina dawngtute hi N. Vanlaiphai SDO huam chhunga khaw hrang hrang, Khawlailung pan remchang zawk  chhungkaw 18 te niin Rs. 20,000 theuh hlan an ni. He tanpuina vek hi tlai lamah E. Lungdar BNRGSK Hall E. Lungdar pan remchang zawk chhungkaw 22 te hnenah Pi Vanlalawmpuii Chawngthu hian hlanna a nei leh bawk ani.

Vawiina training buatsaih hi Northeast Region Textile Promotion Scheme (NERTPS) hnuaia buatsaih niin,  he scheme Project Co-ordinator leh Deputy Director Pu Lalremsiama chuan a scheme kalphung leh a thil tum te, pangang vulhtute tana thil pawimawh te sawifiahna a nei a. India ramin a mamawh khawp Silk a tharchhuah tak loh avangin Silk tharchhuahna kawnga hmasawnna nasa tak a awm theih nan  Central sawrkar chuan state matching share pawh awm meuh lovin hmalakna tur sum min rawn pe a. Serchhip District a hmalaknaah Khawlailung khua chu duhsakin chhungkaw tam tak thlan an ni a, vawiinah hian duhsak tlak, hlawhtling ngei tura beitu nih theuh kan tum a tul ani, a ti. In hlawhtlinna hian Mizoram a tihmingtha anga, in hlawhchhamna in min timualpho hlauh thei bawk ani, tiin pangang vulhtute theihtawp chhuah turin a ngen ani. Tin,   Dr. Lalthlamuana Pachuau, Scientist C, Research Extension Centre, Aizawl, Central Silk Board chuan an training dan tur kalphung sawifiahna a nei bawk.

He mi hnu hian loneitu kalkhawm te chu Dr. Lalthlamuana Pachuau, Scientist C, R. Laldinsanga, PGDS,  Israel Lalrokima, PGDS, Lalramchuana, Project Assistant leh Zonunsangi Zote, Project Assistant ten Pangang vulh dan leh Pangang chaw hmun enkawl dan chi hrang hrangte kimchang takin an zirtir a ni.

 

Attachment

  • Loading attachment...